اټلانټا (پژواک، ۲۵ سلواغه ۱۴۰۱): د پښتون ژغورنې غورځنګ یمخکښ غړی او د پاکستان په پارلمان کې د سویلي وزیرستان د خلکو استازی علي وزیر له څه باندې دوو کلونو بند روسته خوشې شو.
د پښتون ژغورنې غورځنګ مشر منظور احمد پښتون دسلواغې په ۲۵مه، پر خپله فېسبوک پاڼه لیکلي “علي وزیر د ۲۶ میاشتې استعماري بند له تېرولو وروسته خوشې شو.”
هغه زیاته کړې چې علي وزیر “د ریاستي جبر پر خلاف د غږ پورته کولو په جرم” زندان وګاله.
منظور پښتني لیکلي : “ظالم نظام زموږ ټولنه په یو غټ جیل بدله کړې ده” او دا چې دوی به د دغه لوی زندان نه لیدل کېدونکي زنځیرونه هم په خپل مزاحمت مات کړي.
تر دې مخکې د ملي جمهوري غورځنګ مشر محسن دوړ پر ټويټر پاڼه لیکلي و چې “د علي وزیر د ماتېدو او په زندان کې د ساتلو هر ډول هڅې وشوې، خو هغه بریالی شو او نن به خوشې شي.”
علي وزیر د ۲۰۲۰م کال ډسمبر پېښور کې پولیسو ونیو او وروسته د کراچۍ پولیسو ته وسپاره چې له همغه راهیسې د کراچۍ په زندان کې بندي وو.
پر نوموړي په کراچۍ او د پښتونخوا په یو شمېر سیمو کې د پولیسو قضیې ثبت شوې وې او په دغو قضیو کې يې پر نوموړي تور پورې کړی وو، چې د پاکستاني ریاست، پوځ او استخباراتو پر ضد يې په ولسي غونډو کې ویناوي کړې دي.
Views: 36
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن