کابل (پژواک، ۲۹ سلواغه ۱۴۰۱): د هرات رېلپټلۍ رییس د ترکمنستان د رېلپټلۍ وزارت له مرستیال سره په لیدنه کې د تورغونډۍ رېلپټلۍ له لارې د لېږد رالېږد پر زیاتولو، د اسانتیاوو پر چمتو کولو او د ورځني کاري وخت پر زیاتولو خبرې وکړې.
د افغانستان رېلپټلۍ ادارې په خپله ټویټرپاڼه کې لیکلي: «د هرات د اوسپنې پټلۍ ریاست رییس مفتي محمدنسیم محمدي د ترکمنستان د اوسپنې پټلۍ وزارت له مرستیال ساریوف او مل پلاوي سره ولیدل.»
سرچینې لیکلي، په دغه لیدنه کې -چې پرون د هرات تورغونډۍ بندر کې شوې- د بېلابېلو ادارو مسوولینو ګډون درلود.
سرچینه زیاتوي، افغان او ترکمن لورو د تورغونډۍ رېلپټلۍ له لارې د توکو د لېږد رالېږد پر زیاتولو، د لا ښه اسانتیاوو پر چمتو کولو، د ورځني کاري وخت پر ډېرولو، له دغه هېواده د سوداګریزو توکو پر خوندي لېږد رالېږد او په ټوله کې د بندر د لا ښه مدیریت اړوند خبرې وکړې.
د سرچینې د معلوماتو له مخې، په لیدنه کې دواړو لورو د دوهاړخیزه همکاریو پر پیاوړتیا هم ټینګار وکړ او وپتېیل شوه چې په نږدې ورځو کې به د دواړو لورو ترمنځ یوه ناسته وشي، څو د چارو د لاښهوالي په موخه په کې اړینې پرېکړې او هوکړې وشي.
د یادونې ده، د سلواغې په ۲۷مه د تورغونډۍ رېلپټلۍ له لارې ٧٥ واګونه خوراکي توکي -چې وزن یې ۵ زره او ۳۳ ټنه و- هېواد ته وارد او ٥٠ ټنه ترانزیټ مالټې له همدې لار بهر ته صادر شوي دي.
افغانستان په داسې حال کې له ترکمنستان سره د تورغونډۍ رېلپټلۍ له لارې د توکو د لېږد رالېږد پر زیاتولو خبرې کړې چې څو ورځې مخکې یې له ازبکستان سره د حیرتان رېلپټلۍ په برخه کې په ۱۰ سلنه تخفيف نوى تړون لاسليک کړ.
د افغانستان او ازبکستان ترمنځ د رېلپټلۍ لار د ځینو ستونزو له امله د ۱۲ ورځو لپاره تړل شوې وه، خو د دواړو هېوادونو د پلاوو ترمنځ له څلور ورځنیو مذاکراتو وروسته بېرته پرانستل شوه.
دا مهال د دواړو هېوادونو ترمنځ په ورځنۍ توګه له ۱۰۰ تر ۱۵۰ واګونونو پورې اموال صادر او واردېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن