کابل (پژواک، ۷ کب ۱۴۰۱): د مالدیف هېواد په مالي ښار کې د څلورو اسیايي هېوادونو ترمنځ د والیبال سیالیو په نیمه پایلوبه کې د سینګاپور والیبال لوبډلې د افغانستان لوبډلې ته ماتې ورکړه.
افغانستان تېره شپه کوربه مالدیف ته په ماتې ورکولو سره په دغو سیالیو کې نیمه پایلوبې ته لار موندلې وه.
د مالدیف والیبال ټولنې نن په خپله فیسبوکپاڼه کې لیکلي، په نیمه پایلوبه کې د سینګاپور لوبډلې افغانستان ته درې- صفر ماتې ورکړه او پایلوبې ته ووتله.
د والیبال دا سیالۍ «د څلورو ملتونو جام» په نوم د روانې فبرورۍ میاشتې په ۲۳مه پيل شوې چې د همدې میاشتې تر ۲۷مې دوام کوي.
په یادو سیالیو کې د افغانستان ترڅنګ د مالدیف، سینګاپور او مالیزیا هېوادونو لوبډلې ګډون لري.
د یادونې ده، په یادو سیالیو کې افغانستان په لومړیو درېیو لوبو کې سینګاپور، مالیزیا او کوربه مالدیف ته ماتې ورکړې وه.
Views: 190
GET IN TOUCH
NEWSLETTER
SUGGEST A STORY
PAJHWOK MOBILE APP