[restrict paid=”true”]
فراه (پژواک، ۱۳ کب ۱۴۰۱): د فراه په خاکسفید ولسوالۍ کې د دوو کورنیو ترمنځ له څلور کلنۍ کلنې دښمنۍ وروسته چې څلور کسان پکې وژل شوي وو، روغه وشوه.
دغه دښمني د فراه ولایت د خاکسفید ولسوالۍ اړوند په ننګاباد کلي کې د ملا اخترمحمد او اغامحمد د کورنیو ترمنځ څلور کاله مخکې له لفظي شخړې وروسته پیل شوې وه او د دواړو کورنیو پکې څلور کسان وژل شوي وو.
د روغې جوړې په دې جرګه کې د فراه ولایت د امر بالمعروف او نهی عنالمنکر ریاست مشر مولوي عبدالمجید صمیم وویل: «د امیرالمؤمنین په ځانګړې لارښوونه، د ولایت مقام تر رهبرۍ او همکارۍ لاندې یې د یوې ناستې په ترڅ کې چې د دغه ولایت والي ملا نورمحمد روحاني او یو شمېر نورو مسؤولینو، علماوو، قومي مخورو او سپین ږیرو منځګړیتوب کاوه، د دغه ولایت د خاکسفید ولسوالۍ د دوه کورنیو جنجال په سوله واړوه.»
بلخوا، د دواړو کورنیو مشرانو ملا اخترمحمد او اغامحمد هم د خپلو خبرو پر مهال د سولې ارزښت په بیانولو سره پر خپلو تېرو کړنو پښېماني وښوده.
ملا اخترمحمد وویل، دوی د مشرتابه مقام، سیمهییزو مسؤولینو او په ځانګړې توګه له امر بالمعروف ریاست څخه مننه کوي چې د سولې او پخلاینې هڅې یې پیل کړې دي او دا د دوی هڅې او تشویق وو چې د دوی روغه یې وکړه.
دغهراز د مقابل اړخ یوه مشر اغامحمد بیا وویل، خوښ دی چې څلور کلنه دښمني یې پر دوستۍ بدله شوه او له دې وروسته به دواړه خپلو منځو کې هیڅ ستونزه و نه لري.
دا په داسي حال کې ده چې په تېر یوه کال کې د یاد ولایت د امربالمعروف اونهی عنالمنکر ریاست د قومي جرګو له لارې شاوخوا ۶۲ شخړې حل کړې دي.
[/restrict]
Views: 125
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن