د ایران په تبریز کې چاودنه شوې؛ پنځه کسان وژل شوي

کابل (پژواک، ۲۱ کب ۱۴۰۱): ایراني رسنیو خبر ورکړی چې د دغه هېواد په تبریز ښار کې د چاودنې له امله پنځه کسان وژل شوي دي.

دغه چاودنه نن سهار د یاد هېواد د ابوریحان تبريز سیمې په یوه ودانۍ کې شوې ده.

تسنیم خبري اژانس د تبريز اطفایې عملیاتي مرستیال له قوله راپور ورکړی چې په دې چاودنه کې پنځه کسان وژل شوي  او درې نور تر خاورو لاندې بند پاتې دي.

تر اوسه د یادې چاودنې علت نه دی په ډاګه شوی، خو دومره زوروره وه چې شاوخوا ۴ نورو ودانیو ته یې زیان اړولی دی.