فرمان: د امارتي (سلطاني) ځمکو وېش او پلورنه د اسلامي امارت د مشر له فرمان پرته منع دی

کابل (پژواک، ۲۹ کب ۱۴۰۱): د اسلامي امارت د مشر د فرمان له مخې، د امارتي (سلطاني) ځمکو وېش او پلورنه د اسلامي امارت د مشر له فرمان پرته منع دی.

د چارو ادارې په ټويټرپاڼه کې راغلي چې د امارتي ځمکو د وېش، پلورنې او انتقال د ممنوعيت په هکله د امیرالمؤمنين فرمان صادر شوی دی.

د دغه فرمان په لومړۍ ماده کې راغلي: «د امارتي (سلطاني) ځمکو وېش او پلورنه د امیرالمؤمنين له فرمان پرته منع دی؛ وزارتونه، امارتي اداري او ښاروالۍ نه شي کولای يادې ځمکې په حقیقي او حکمي اشخاصو ووېشي یا وپلوري.»

د فرمان په دويمه ماده کې راغلي: «وزارتونو، امارتي ادارو او ښارواليو ته د امارتي (سلطاني) ځمکو انتقال د امیرالمؤمنين له فرمان پرته منع دي. د اړتيا پرمهال د يادو ځمکو انتقال د فرمان پر اساس صورت مومي.»

په فرمان کې څرګنده شوې چې دغه فرمان د توشېح له نېټې څخه نافذ او په رسمي جريده کې دې خپور شي.