بلینکن: افغانستان کې یو شمېر امریکایان په توقیف کې دي

اټلانټا (پژواک، ۴ وری ۱۴۰۲): د امریکا متحده ایالتونو د بهرنیو چارو وزیر انټوني بلینکن ویلي، په افغانستان کې یې یو شمېر وګړي په توقیف کې دي او دوی یې د خوشي کولو هڅې کوي.

نوموړي له افغانستانه د امریکايي ځواکونو د نامنظم وتلو په اړه د امریکا کانګرس ته د معلوماتو ورکولو پر مهال ویلي، د افغانستان سرپرست حکومت «څو امریکایان» توقیف کړي دي، خو د هغوی شمېر یې په ډاګه نه کړ.

د امریکا د بهرنیو چارو وزیر وویل: «موږ د دوی د ازادۍ د خوندي کولو لپاره کار کوو، د دوی کورنیو له موږ څخه غوښتنه کړې چې د هغوی هویت پټ وساتو او د دوی د قضیې په اړه په علني توګه خبرې ونه کړو.»

بلینکن وويل، د امريکا د بهرنيو چارو وزارت له افغانستانه د ٩٧٥ امريکايي وګړو د وتلو زمينه برابره کړې او شاوخوا ١٧٥ کسان چې وايي د امريکا تابعيت لري، په افغانستان کې پاتې دي، چې ځيني يې د طالبانو له واکمنۍ وروسته دغه هېواد ته تللي دي.

login or register a new account.