بلخ کې د ترافیکي پېښې له امله ۷ کسانو ته مرګ‌ژوبله اوښتې ده

[restrict paid="true"]

مزارشریف (پژواک، ۲۷ وری ۱۴۰۲): د بلخ د چهاربولک ولسوالۍ په تیمورک سیمه کې د ترافیکي پېښې له امله دوه کسان مړه او پنځه نور ټپیان شوي دي.

د بلخ امنیې قوماندانۍ ویاند محمداصف وزیري د وري په ۲۷مه پژواک خبري اژانس ته وویل، پېښه نن له غرمې وروسته شاوخوا یوه نیمه بجه د چهاربولک ولسوالۍ په تیمورک سیمه کې د سراچې او سوزوکي موټرو د ټکر له امله شوې ده.

هغه وایي، په دې پېښه کې دوه کسان  مړه او پنځه نور ټپیان شوي دي.

وزیري وایي، ټپیان د امنیې قوماندانۍ د شاهراه کنډک امنیتي کسانو له لوري د بلخ حوزوي روغتون ته لېږدول شوي او روغتیایي وضعیت یې د ډاډ وړ بولي.

د نوموړي په وینا، پېښه د چلوونکو د بې احتیاطۍ او ترافیکي قوانینو نه مراعاتولو له امله شوې ده.

د امنیتي مسوولینو په وینا، په دې پېښه کې یو ماشوم د ټپیانو په ډله کې دی او پاتې ټول یې نارینه لویان دي.

بلخ کې دغه پېښه په داسې حال کې رامنځته کېږي چې تېر ۱۴۰۱ کال د دغه ولایت په کچه د ۷۵ ترافیکي پېښو په پایله کې ۱۶۳ کسانو ته مرګ‌ژوبله اوښتې وه.

[/restrict]