کابل (پژواک، ۲۷ وری ۱۴۰۲): د ملي دفاع وزارت وایي، څه باندې ۲۲۰ ملکي او پوځي منسوبین چې په دې وروستیو کې د خپلو دندو د خدمت ټاکلې مودې پای ته رسېدو له امله تقاعد ته سوق شوي وو، په بالمقطع ډول بېرته جذب شوي دي.
د ملي دفاع وزارت دغه څرګندونې پر خپله ټوېټرپاڼه کړې دي.
سرچینې لیکلي، د ملي دفاع وزارت په تخنیکي، مسلکي او تخصصي برخو کې د غوره خدمتونو وړاندې کولو او په چارو کې د ځنډ مخنیوي په موخه د ياد وزارت د بېلابېلو څانګو ۲۲۶ منسوبین چې په دې وروستیو کې د خپلو دندو د خدمت ټاکلې مودې پای ته رسېدو له امله تقاعد ته سوق شوي وو، د کاري قانون په نظر کې نيولو سره د کارکوونکو د بالمقطع مقررې د تنظيم له مخې بياځلي په اړوندو قطعاتو کې ورته د خدمت زمينه برابره شوه.
سرچینه زیاتوي، په ورته وخت کې د ملي دفاع وزارت هغه اوازې ردوي چې ګواکې دغه وزارت فني او مسلکي پرسونل د ذاتي قانون له په پام کې نیولو پرته تقاعد ته سوق کړي دي.
دفاع وزارت لیکلي چې یاد وزارت د خپل پرسونل د افسرانو د ذاتي قانون او ملکي خدمتونو د مقرراتو له قانون پرته هيڅوک تقاعد ته نه دي سوق کړي.
د سرچینې د معلوماتو له مخې، دغه وزارت ژمن دی چې مسلکي او متخصص کسان جذب کړي او د اړتیا په صورت کې د خپلو کارکوونکو له تجربو ګټه واخلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن