د قطر ۶۰ ټنه مرسته شوي توکي کابل ته راورسېدل

کابل (پژواک، ۲۹ وری ۱۴۰۲): د قطر هېواد ۶۰ ټنه مرسته شوي مواد چې خوراکي توکي، جامې او قرطاسیه په کې شامل دي، کابل ته راورسېدل.

په افغانستان کې د قطر سفارت له خوا نن پژواک خبري اژانس ته په رااستولې خبرپاڼه کې راغلي چې دغه مرسته د قطر الخیریه موسسې کړې ده.

سرچینې لیکلي چې په دغه مرسته کې خوراکي توکي، جامې او د پوهنې وزارت لپاره قرطاسیه شامل دي.

په خبرپاڼه کې راغلي چې یاد توکي د کابل هوايي ډګر کې د افغانستان د سرپرست حکومت استازو ته وسپارل شول.