میدانښار (پژواک، ۲۸ غویی ۱۴۰۲): په میدان وردګو کې د بدني روزنې او ورزش آمریت له لوري نن د پنځو ولایتونو د تکواندو ټیمونو ۷۰ ورزشکارانو ترمنځ ملي ټيم ته د غوراوي سیالۍ پای ته ورسېدې چې د کوربه ولایت ټیم لومړی مقام خپل کړ.
د یاد ولایت د بدني روزنې او ورزش آمر ذبیحالله وهاج پژواک خبري اژانس ته وویل، په دغه دوه ورځنۍ سیالیو کې د غزني، ننګرهار، پروان، کندوز، کابل او میدان وردګ ولایتونو لوبډلو ګډون کړی وو.
هغه زیاته کړه: «له سیالیو مو هدف د ورزش هرې برخې ته وده ورکول او ورزش ته د ځوانانو هڅول وو.»
د زینالله په نوم د کابل ولایت یوه ورزشکار وویل، دغه ډول سیالۍ د ځوانانو د هڅونې لپاره ګټه لري او باید ډېرې شي.
د بغلان ولایت د تکواندو لوبډلې یوه غړي عبدالبصیر توکلي وویل، دا ډول سیالۍ د ورزشکارانو د لا پیاوړتیا او پرمختګ لپاره ډېرې مهمې دي.
هغه وویل: «د دغه سیالیو له پای ته رسېدو ورسته به غوره لوبغاړي ملي لوبډلې ته لار پیدا کوي او د هېواد لپاره به ویاړونه راوړي.»
په میدان وردګو کې د تکواندو یادې سیالۍ داسې مهال ترسره کېږي چې تېره اوونۍ په دغه ولایت کې د ووشو سیالۍ هم ترسره شوې.
Views: 49
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن