متقي: نړۍ پر قطبونو د وېش په حال کې ده، له دغه فرصته د هېواد په ګټه د استفادې هوډ لرو

کابل (پژواک، ۴ غبرګولی ۱۴۰۲): چارواکي وایي، اوسنی حکومت ټولګډون دی، له نړۍ سره مثبتې اړیکې غواړي، د ناخوالو له منځه وړلو ته ژمن دي، د اتحاد او پرمختګ فکر او د نړۍ له اوسني وضعیت څخه د هېواد په ګټه د استفادې هوډ لري.

چارواکو دغه څرګندونې نن د ریاست‌الوزرا کفیل او مرستیال مولوي عبدالکبیر، د کابینې ځینو غړو او قومي مشرنو په ګډون جوړه شوې غونډه کې وکړې.

مولوي عبدالکبیر په دغې غونډه کې وویل چې په افغانستان کې اوسنی سرپرست حکومت ټول‌ګډونه دی او پکې د هر قوم او هرې سیمې خلک کار کوي.

هغه زیاته کړه چې افغانستان په سیاسي او اقتصادي ډګر کې پرمختګ کړی او اوسنی حکومت له نورې نړۍ سره مثبتې اړیکې غواړي.

هغه دا هم وویل، که افغانستان نورې نړۍ ته اړتیا لري، نوره نړۍ هم افغانستان ته اړتیا لري.

مولوي عبدالکبیر زیاته کړه، د افغانستان خاوره د هېڅ ګاونډي او نورو هېوادونو پر وړاندې نه‌ده کارول شوې او نه به وکارول شي او په‌ دې اړه هېڅوک داسې ثبوت نه ‌شي وړاندې کولی چې د افغانستان خاوره د چا پر وړاندې کارول شوې وي.

هغه وويل: «حاضر یم چې د مراجعینو ستونزې او له مسؤولینو د شکایتونو قضیې په لوړه کچه د حل په موخه تر امیرالمؤمنین حفظه‌الله پورې وروسوم.»

نوموړي وویل، حکومت د ناخوالو له منځه وړلو ته ژمن دی او پر ټول ولس حسن نیت لري.

په یاده غونډه کې د بهرنیو چارو سرپرست وزیر مولوي امیرخان متقي هم وویل چې په افغانستان کې د ټولو تېرو شوو «یرغلونو او ډلو ټپلو» تګلاره دا وه چې افغانان تقسیم کړي او ترمنځ یې تعصوبونه او تبعیضونه ایجاد کړي، خو د اوسني حکومت تګلاره د افغانانو ترمنځ یووالي رامنځته کول او د فاصلې له منځه وړل دي.

هغه وویل، دا چې نړۍ پر قطبونو د وېش خواته روانه ده، اوسني قوتونه له منځه ځي او نوي رامنځته کېږي، په دغه لړ کې به د افغانستان رول مثبت وي او له دغه فرصته حکومت د هېواد د هراړخیزې ګټې اخیستنې هوډ لري.

متقي زیاته کړه، د وزارتونو په تشکیلاتو کې هېڅ ډول تبعیض نشته او هغه څوک چې د دولتي ادارو په تشکیلاتو کې د تبعیض ادعا کوي، هغوی ته حق ورکوي چې د بهرنیو چارو وزارت تشکیلات وڅېړي.

مولوي امیرخان متقي وايي، اسلامي امارت د ملت غوښتنو ته لومړيتوب ورکوي او د دغه ملت په غوښتنه یې د امو سیند د تخریباتو مخنیوي ته مټې را نغاړلې دي.

په یاده غونډه کې د کانونو وزارت سرپرست شیخ شهاب‌الدین دلاور هم وویل، د هغه د ژوند په اوږدو کې دا لومړی ځل دی چې په هېواد کې مرکزي حاکمیت او ملي امنیت حاکم شوی دی.

هغه په کانونو وزارت کې د مسلکي ځوانانو د جذب هوډ څرګند کړ او پر ځوانانو یې غږ وکړ چې خپلې وړتیاوې او استعدادونه د هېواد د ابادۍ لپاره وکاروي.

دلاور وویل، د دغه وزارت هېڅ کارکوونکی د تېرې ادارې په نوم له دندې نه دی ګوښه شوی او اوس په دغه وزارت کې د ۱۷۵ ښځو په ګډون، د بېلابېلو قومونو او مذهبونو څه باندې دوه زره او ۵۰۰ کارکوونکي پر دندو بوخت دي.

په یاده غونډه کې د اسلامي امارت بل لوړپوړي چارواکي انس حقاني هم وویل، هغه څوک چې سخت‌دریځي او جګړه‌ییز فکرونه لري، هغوی له پرمختګ او ترقۍ محروم شوي او پر افغانستان تحمیل شوې جګړې او راغلې غمیزې د دغو فکرونو محصول دی.

هغه وویل چې اسلامي امارت په اتحاد، نږدېوالي او یو بل منلو کې د پرمختګ او ترقۍ فکر او هوډ لري.

 په یاده غونډه کې د امربالمعروف، نهی عن‌المنکر او شکایتونو اورېدو سرپرست وزیر شیخ محمدخالد حنفي وویل، شخصي حریم او د هېوادوالو عزت د احترام وړ دی، که څوک په دې برخه کې شکایت لري، د امربالمعروف وزارت د شکایتونو اورېدو له معینیت سره دې شریک کړي.

نوموړي وویل، حاکم اسلامي نظام ټولګډونه دی او په ټولو ادارو کې یې د هر مذهب او قوم وګړي پر دندو بوخت دي.