۳۴۲ ټنه بې‌کیفیته تېل له حیرتان بندره بېرته قرغيزستان ته ګرځول شوي

مزارشریف (پژواک، ۱۳ غبرګولی ۱۴۰۲): د افغانستان د سټندرډ ملي اداره وایي، له قرغزستانه وارد شوي ۳۴۲ ټنه بې‌کیفیته تېل یې د بلخ له حیرتان بندره بېرته د ازبکستان له لارې دغه هېواد ته ورګرځولي دي.

د حیرتان بندر د سټندرډ ملي ادارې امر مولوي یحیی لقمان وایي، تېره ورځ یې له قرغزستانه راغلي ۳۴۲ ټنه او ۷۸۵ کیلو پټرول تېل چې تېره میاشت راوارد شوي وو او د دې ادارې د نورم او سټندرد له معیارونو سره په مغایرت کې وو، بېرته د ازبکستان له لارې دغه هېواد ته ورګرځولي دي.

د مولوي یحیی په وینا، دا په تېرو شلو کلونو کې لومړی ځل دی چې په دغه کچه تېل بېرته ګرځول کېږي.

دا په داسې حال کې ده چې تېره اونۍ هم له ازبکستانه وارد شوي ۱۹ ټنه بې‌کیفیته ګاز بېرته دغه هېواد ته ورګرځول شوی و.

د نورم او ستنډرډ ادارې معلوماتو له مخې، په تېر کال کې شاوخوا زر تانګره بې‌کيفته نفتي توکي بېرته اړوند هېوادونو ته ورګرځول شوي دي.