بامیان کې وچکالي؛ ځیني کروندګر نه دي توانېدلي چې خپلې ځمکې وکري

بامیان (پژواک، ۱۵ غبرګولی ۱۴۰۲): د بامیان یو شمېر اوسېدونکي د اندېښنې په څرګندولو سره وایي، سږ کال په دغه ولایت کې د وچکالۍ له امله کروندګر نه دي توانېدلي چې په خپلو کرنیزو ځمکو کې څه وکري او مسوولین باید دې برخې ته پاملرنه وکړي.

د یاد ولایت د مرکز اړوند د «شبرتو» سیمې یوه اوسېدونکي محمدعالم پژواک خبري اژانس ته وویل: «په تېرو ۳۰ کلونو کې سږنۍ وچکالي بې‌سارې وه، یو شمېر خلک د اوبو کمښت له امله نه دي توانېدلي چې خپلو کرنیزو ځمکو کې کښت وکړي.»

د هغه په وینا، د یادې سیمې شاوخوا ۹۰ سلنه اوسېدونکي پر کرنې بوخت دي چې د ژوند ډېری لګښتونه له همدې لارې پوره کوي.

د بامیان د دغه اوسېدونکي په باور، که د وچکالۍ له امله کرنیزې ځمکې له حاصلاتو پاتې او د خړوبولو زمینه یې برابره نه شي، نو د سیمې خلک به په راتلونکي کې له جدي ستونزو سره مخ شي.

د اوبو کمښت ستونزه  یوازې په یاده سيمه کې نه ده، بلکې د بامیان ډېری اوسېدونکي یې اندېښمن کړي دي.

د بامیان د ورس ولسوالۍ اوسېدونکی عبدالستار په دې اړه وایي، په تېرو کلونو کې د پسرلي موسم په رسېدو سره ډېری ویالې له اوبو ډکېدلې او خلک به د اوبو له کمښت سره نه مخ کېدل.

خو هغه زیاته کړه چې په وروستیو دوو کلونو کې یاده ولسوالۍ کې د وچکالۍ کچه د پام وړ ډېره شوې او د کرنیزو ځمکو خړوبولو لپاره کافي اوبه نشته.

د هغه په وینا، د وچکالۍ ډېرېدل د کروندګرو ترمنځ د شخړو او جنجالونو رامنځته کېدو لامل هم شوی دی.

همداراز، د پنجاب ولسوالۍ اوسېدونکی محرم علي وايي، د دغې ولسوالۍ یو شمېر اوسېدونکي د هغو چینو د اوبو له کمېدو هم اندېښمن دي چې دوی یې د څښاک لپاره کاروي.

د هغه په وینا، که وچکالي دوام وکړي، ډېری چینې به وچې شي چې په دغه حالت کې د سیمې خلک ان دا وس هم نه لري څو ځانته د څښاک اوبه برابرې کړي.

هغه له مسوولینو غواړي چې یادې برخې ته پاملرنه او د خلکو ستونزو ته رسېدنه وکړي.

بل‌پلو، د بامیان د کرنې رییس ملا ګلاب‌الدین رب‌دوست وایي چې د اوبو کمښت د افغانستان په کچه یوه ستونزه ده او د بامیان خلک هم ورسره مخ دي.

نوموړی زیاتوي، د بامیان د کرنې ریاست په ۱۴۰۲ کال کې پلان لري څو د کوچنیو بندونو، د کرنیزو کانالونو او په غرونو کې د اوبو ذخیره کولو ځایونو په جوړولو سره د اوبو سرچینې مدیریت کړي.

همداراز، د بامیان د کرنې رییس یادونه وکړه، د کرنې وزارت په روان کال کې پلان لري چې د دغه ولایت د کرنې برخې ودې او پرمختګ لپاره ۳۳۴ میلیون افغانۍ ولګوي.