نړۍوال بانک: دوامداره اقتصادي بحران د افغانستان وده او پرمختګ ټکني کړي

اټلانټا (پژواک، ۱۶ غبرګولی ۱۴۰۲): نړۍوال بانک وايي، د سیمې هېوادونه، په ځانګړي ډول افغانستان له اقتصادي پلوه لوی زیان ګاللی او دوامدار بحران د دغه هېواد وده او پرمختګ ټکني کړي دي.

دغه بانک د غبرګولي په ۱۶مه په خپل تازه راپور کې د خوړو نړۍوال پروګرام په حواله ویلي، په افغانستان کې بېوزلي حاکمه ده او د ناکافي عوایدو له امله د دغه هېواد ۹۲ سلنه خلکو ته بشپړ خواړه نه رسېږي.

د امریکا غږ د خبر له مخې، په دغه راپور کې دغه راز ویل شوي چې په افغانستان کې د ۲۰۲۲ کال د جولاۍ میاشتې په پرتله د ۲۰۲۳ کال د مارچ په میاشت کې د لګښتونو [توکیو] د بیو کچه له دوو عددونو ۱.۹ ته راټیټه شوې ده.

نړۍوال بانک وايي، په ساړه ژمي کې په دغه هېواد کې د عوایدو فرصتونه کمزوري شوي چې د کرنې، بیارغونې او نورو برخو د فعالیتونو د شاتګ لامل شوي، خو ویلي یې دي، تمه ده د بهرنیو مرستو له ترلاسه کولو وروسته، په راروانو دوو کلونو کې د افغانستان اقتصادي وده مثبته شي.