کابل (پژواک، ۲ چنګاښ ۱۴۰۲): اروپايي ټولنې خبر ورکړی چې په افغانستان کې له ټولو ډېر زیانمنونکو سره د معیشتي او خوراکي توکو برخه کې د ملاتړ لپاره ۱۲ میلیون یورو مرسته کوي.
یادې ټولنې تېره ورځ ناوخته پر خپله ټویټرپاڼه لیکلي، دغه رقم پيسې یې د دې ټولنې شریکانو ته، لکه د اغاخان بنسټ، د ډنمارک کډوالو شورا او د افغانستان لپاره د کرنې پراختيا او پیاوړتیا ورکولو ټولنې ته له زيانمنو افغانانو سره د مرستې لپاره اختصاص کړې دي.
سرچینې زیاته کړې، دغه بودجه چې نن اعلان شوه، د نړۍ له تر ټولو په ستر بشري ناورین کې د افغانانو لپاره د اساسي اړتیاوو اصولي ملاتړ برابروي.
د یادې ټولنې په وینا، په دې مرستو کې د ډاډمنتیا لپاره د خوراکي توکو دوامداره تولید، عصري کرنه او انتعطافمنونکې زیربناوې، له ټولنې سره په تړاو کاري زمینې، د عاید او سپما فرصتونه او د بازار پر اساس د سوداګرۍ پراختیا شامل دي.
خبرپاڼې د افغانستان لپاره د اروپایي ټولنې شارژدافیر رافایلا ایودیس په حواله لیکلي: «په افغانستان کې میلیونونه کسان له لوږې سره مخ دی، په داسې حال کې چې د اقلیم بدلون به وضعیت نور هم سخت کړي، په ځانګړې توګه د ښځو لپاره.»
هغه څرګنده کړه، اروپايي ټولنه له خپلو شریکانو سره یوځای د افغانانو ترڅنګ ولاړه ده.
نوموړي زیاته کړه چې د خوراکي توکو دوامداره تولید، د طبیعي او اقلیمي خطرونو پر وړاندې مقاومه ځیرکه کرنه او انعطافمنونکي زیربنا د پانګونې له لارې د افغانانو د نن او راتلونکي ژوند کې رښتینی بدلون رامنځته کوي.
دغه راز په افغانستان کې د ډنمارک کډوالو شورا استازي پولندران تارمندرا ویلي: «د اروپايي ټولنې مالي ملاتړ موږ د دې جوګه کوي څو د افغانستان په محرومو سیمو کې د کارموندنې او پایدار درامد لپاره د کلیدي بازارونو پیدا کولو او په پښو درولو سره له زیانمنو افغانانو سره د اړتیا وړ اساسي مرستې وکړو.»
د خبرپاڼې له مخې، دغه مالي مرسته د یوې ۳۶ میاشتنۍ دورې لپاره د افغانستان شمالي، مرکزي او لوېدیځو محرومو کیلوالي سیمو ته په پام کې نیول شوې ده.
اروپايي ټولنه او شریکان یې په پام کې لري څو د یادې پروژې له لارې ۷۰ زره کسان چې ۶۲ سلنه یې ښځې دي، تر پوښښ لاندې راولي.
بلخوا، نږدې ۵۰۰ زره کورنۍ په بغلان، بامیان، سمنګان، بدخشان، تخار، هرات او فراه ولایتونو کې له حمایتي پروګرامونو برخمنې کېږي.
اروپايي ټولنه دغه راز زیاتوي، د دې ټولنې بشري مرستې او اساسي اړتیاوې پرته له تبعیضه او د بسپنه ورکوونکو له اصولو سره سم وړاندې کېږي او تل د خپلو باوري شریکانو له لارې لېږل کېږي.
دا په داسې حال کې ده چې له دې مخکې په افغانستان کې د ملګرو ملتونو د بشري مرستو همغږي کوونکي دفتر (اوچا) خبر ورکړی و چې په افغانستان کې د لوږې او خوارځواکۍ شدت لا هم په لوړه کچه کې دی او ۸۴۰ زره امیدوارې او شیدې ورکوونکې میندې او څه باندې درې میلیونه ماشومان پر حاد، شدید او منځنۍ خوارځواکي اخته دي.
غړيYou need to subscribe to view the full article. Please login or register a new account.
