<p style="text-align: justify;">کابل (پژواک، ۳ چنګاښ ۱۴۰۲): د ریاستالوزراء سیاسي مرستیال او کفیل د ملګرو ملتونو له استازي سره په لیدنه کې ویلي، د ا.ا.ا په نړۍوالو رقابتونو او سیاستونو کې ناپېیلی دریځ لري او هیڅکله به د یو اړخ خوشحالولو لپاره د بل اړخ پر ضد دریځ ونه نیسي.</p>
<p style="text-align: justify;">ارګ پر خپله ټوېټرپاڼه لیکلي، د ریاستالوزراء سیاسي مرستیال او کفیل مولوي عبدالکبیر تېره ورځ د افغانستان لپاره د ملګروملتونو له ځانګړي همغږيکوونکي فریدون سینیرلي اوغلو او مل پلاوي سره وکتل.</p>
<p style="text-align: justify;">فریدون هادي سينيرلي اوغلو په دې لیدنه کې ویلي، کمه موده کېږي چې د ملګرو ملتونو له لوري ورته د خپلواکې ارزونې ترڅنګ د افغانستان په اړه د راپور جوړولو دنده ورسپارل شوې چې څه ډول کېدای شي د افغانستان او نړۍوالې ټولنې ترمنځ اړیکې پیاوړې شي.</p>
<p style="text-align: justify;">هغه ویلي، اوسمهال په افغانستان کې جنګ ختم شوی او دا دوه کاله کېږي اسلامي امارت پر ټول هېواد واکمن دی او په افغانستان کې سوله او ثبات رامنځته شوی دی.</p>
<p style="text-align: justify;">د هغه په وینا، د افغانستان سرپرست حکومت د امنیت تامین، د فساد ضد مبارزې او نشهیې توکو د له منځه وړو په برخو کې مهم پرمختګونه کړي چې نړۍواله ټولنه یې قدرداني کوي، چارې یې له نږدې څاري او نړۍواله ټولنه غواړي ښې اړیکې ولري.</p>
<p style="text-align: justify;">هغه زیاته کړې، افغانستان په سیمه کې د ستراتيژيک موقعيت په لرلو سره د سترو سیمهييزو پروژو په پلې کولو کې مهم رول لري؛ له دې امله په افغانستان کې داخلي ثبات او د امنیت تامین ډېر ارزښت لري، نړۍواله ټولنه په افغانستان کې د داخلي امنیت ټینګښټ ترڅنګ له ګاونډیو هېوادونو او سیمې سره ښو اړیکو جوړولو ته ارزښت ورکوي او غواړي د افغانستان د داخلي امنیت تامین او ثبات همداسې دوام ومومي.</p>
<p style="text-align: justify;">د خبرپاڼې له مخې، مولوي عبدالکبیر په دې ناسته کې ویلي، افغانستان د ملګرو ملتونو د تاسیس په دویم کال د یاد سازمان غړیتوب ترلاسه کړی او غواړي په راتلونکي کې هم د هېوادنیو ګټو په نظر کې نیولو سره د دغه سازمان ژمن او فعال غړی واوسي.</p>
<p style="text-align: justify;">هغه زیاته کړې، دوی په افغانستان کې د ملګرو ملتونو د مثبت رول لا پیاوړتیا غواړي او د امنیت شورا وروستۍ ناستې ته د ملګرو ملتونو د سرمنشي ځانګړې استازې د اعلامیې د ځینو برخو هرکلی کوي چې په افغانستان کې یې پر مثبتو بدلونونو اعتراف کړی.</p>
<p style="text-align: justify;">دی زیاتوي: «اسلامي امارت له نړۍ سره د متقابل احترام په فضا کې مثبت تعامل غواړي او هیلهمن دی چې تاسو د دغه تعامل لپاره لاره هواره کړئ. اسلامي امارت په نړۍوالو رقابتونو او سیاستونو کې ناپېیلی دریځ لري او هیڅکله به د یو اړخ خوشحالولو لپاره د بل اړخ پر ضد دریځ ونه نیسي.»</p>
<p style="text-align: justify;">مولوي عبدالکبیر دغه راز ویلي، په افغانستان کې امنیت راغلی، د مخدره توکو تولید او قاچاق بند شوی، د جنایي جرمونو، غصب او اداري فساد مخه نیول شوې او افغانان په پوره ډاډ سره په خپل هېواد کې ژوند کوي.</p>
<p style="text-align: justify;">هغه ویلي چې اسلامي امارت ټولګډون حکومت ته ژمن دی، په اوسني نظام کې د افغانستان د هر قوم او ولایت خلک په لوړو او ټيټو بستونو کې کار کوي او هڅه کوي چې لا زیات متخصص او هېواد ته ژمن خلک په خپله اداره کې ځای پر ځای کړي.</p>
<p style="text-align: justify;">د هغه په وینا، هیچا ته د دې اجازه نه ورکوي چې د افغانستان خاوره د نورو پر ضد وکاروي او په دې اړه موجودې بې بنسټه ادعاوې په کلکه ردوي.</p>
