کندهار (پژواک، ۱۸ چنګاښ ۱۴۰۲): د کندهار شاولیکوټ ولسوالۍ په حسنزور کلي کې د یوه سپينږیري کس مړی موندل شوی دی.
چارواکي وایي، ښکاري چې یا کس شاوخوا دوولس ورځې مخکې په دې سیمه کې مړ شوی وي خو د مړینې لامل یې تر اوسه معلوم نه دی.
د کندهار امنیې قوماندانۍ ویاند حافظ صابر په دې اړه وایي: «خلک وایي، لس – دوولس ورځې کېږي چې دغه سړی مړ شوی او داسې لیونی طبعه سړی و.»
هغه وویل، د دغه سپینږیري له مړي سره یوازې یوه عریضه پیدا شوې چې د کندهار ولایت مقام ته لیکل شوې وه خو کورنۍ یې تر اوسه پیدا شوې نه ده..
دغه عریضه چې د رحیمداد په نوم لیکل شوې له ولایت مقامه پکې دغه کس د خپلې اته کسیزي کورنۍ لپاره د مرستې غوښتنه کړې ده.
د سیمي اوسېدونکي وایي، د دغه کس د پښو برخه تر ډېره نشته او داسي ښکاري چې وحشي حیواناتو خوړلی وي.
د شاولیکوټ ولسوالۍ یو اوسېدونکی سید غلام وایي، تر اوسه د دغه سړي کوم خپلوان نه دي موندل شوي او اوس مهال یې جسد د شاولیکوټ په روغتیايي کلینیک کې پروت دی.
هغه وویل: «داسې معلومېږي لکه ډېرې ورځې چې کېږي مړ شوی وي، نو د مړینې علت یې خدای ته معلوم دی خو د پښو خوا نیمه برخه یې نشته، لکه یو شي چې خوړلی وي.»
Views: 204
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن