پارون، فیضاباد (پژواک، ۱۸ چنګاښ ۱۴۰۲): ځایي چارواکي وایي، د نورستان په کامدېش ولسوالۍ کې د اوبو رسونې یوې شبکې جوړولو چارې پيل او بلخوا بیا د بدخشان په شهربزرګ ولسوالۍ کې د کرنیزو اوبو لپاره شپږ ذخیرې ګټې اخیستنې ته وسپارل شوې.
د نورستان د کليو پراختيا رياست د پروګرامونو مسوول انجنير کامران مشتاق وایي، د دغه ولايت د کامديش ولسوالۍ په ميردېش کلي کې د يونيسف په مالي لګښت د اوبو رسونې یوې شبکې جوړولو چارې پيل شوې.
هغه وایي، پر یاده پروژه ۳،۱ میلیون افغانۍ لګښت راځي چې د يونيسف ادارې له لوري ورکول کېږي او د نظارت چارې يې د نورستان د کليو پراختيا ریاست پر غاړه لري .
د نوموړي په خبره، د يادې شبکې جوړولو په پايله کې به ۳۲۰ کورنيو ته د څښاک پاکې اوبه او لسګونه کسانو ته به د يو کال لپاره د کار زمينه برابره شي .
د ميردېش اوسېدونکى روحالله له پژواک سره خبرو کې د يادې شبکې پر جوړيدو خوښي وښوده او زياته يې کړه چې تير کال د پاکو اوبو نشتوالي له امله د دوى په کلي کې د کولرا ناروغي ولګېده او خلک يې له جدي ستونزو سره مخ کړل .
هغه وايي، خوشحاله دى چې خپل کلي کې ورته کار روزګار پيدا شو .
دغه راز د بدخشان شهربزرګ ولسوالۍ په برلاس کلي کې د کرنيزو اوبو شپږ ذخیرې چې د ۱۵۰ جريب ځمکو خړوبولو وړتيا لري، نن د سيمهييزو چارواکو له خوا پرانيستل شوې.
د کرنې، اوبو لګولو او مالدارۍ ریاست د کرنیزو چارو رئیس قاري احسانالله سراجي وايي چې یادې د اغاخان پراختیايي ادارې له خوا جوړې شوې دي.
هغه زياتوي، د کرنيزو اوبو دغه زېرمې د سولر پمپ په سيسټم سمبالې دي چې له کوکچې سینده د ٦٠٠ تر ٧٠٠ مترو په لوړوالي اوبه پمپ کوي او ١٥٠ جريب للمي ځمکه په کرنيزه بدلوي.
خو هغه د یادو ذخيرو لګښت په اړه معلومات ورنه کړل.
Views: 208
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن