کابل (پژواک، ۱۹ چنګاښ ۱۴۰۲): د کابل ښاروالۍ مسوولینو د دغه ولایت په بګرامیو ولسوالۍ کې د ۱۰۰ جریب غصب شوې ځمکې راګرځولو خبر ورکړی دی.
نن کابل ښاروالۍ په یوه ټويټ کې ویلي، د کابل ښار په بګرامیو ولسوالۍ کې د مهاجرینو په نوم یوه سیمه له غاصبینو راوګرځول شوه.
په ټويت کې راغلي، په دې سیمه کې د غاصبینو له خوا جوړ شوي تاسیسات هم تخریب شوي دي.
د سرچینې په خبره، یاده سیمه به د ښاري ماسټرپلان مطابق پر شنه سیمه بدله او د تخنیکي او تدارکاتي مراحلو له بشپړېدو وروسته به د هغه د سړک جوړولو چارې هم پیل شي.
د کابل ښاروالۍ استازي نعمتالله بارکزي پژواک ته وویل، د کابل ښار په ۲۲مه ناحیه کې سل جریب دولتي ځمکه چې کلونه مخکې غصب شوې وه، په تېرو دوو ورځو کې له غاصبینو راوګرځول شوه.
هغه زیاته کړه، د اسلامي امارت له بیا واکمنېدو وروسته تر اوسه په کابل کې ۱۳۰۰ جریب غصب شوې ځمکه له غاصبینو راګرځول شوې چې ډېره برخه یې د کابل ښار په ۴، ۵، ۱۵ او ۲۲ ناحیو کې وې.
د هغه په خبره، د ځمکو غصب جرم ګڼل کېږي او له غاصبینو سره به قانوني چلند وشي.
Views: 43
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن