ګردېز (پژواک، ۲۴ چنګاښ ۱۴۰۲): د پکتيا مرکز ګردېز د تېرې کنډو په سيمه کې د ۳۵۰ زره امريکايي ډالرو په ارزښت يو جومات جوړ او پرانيستل شو.
د ياد جومات جوړوونکي ملي سوداګر حاجي ميرزا کټوازي پژواک خبري اژانس ته وويل، د سليمان بابا جومات د کابل– ګردېز پر لويه لاره په تېرې کنډو سیمه کې موقعيت لري چې ۳۵۰ زره امريکايي ډالر لګښت پرې راغلی او د دوو کلونو په موده کې يې چارې بشپړې شوې دي.
هغه زياته کړه، دغه جومات په نوې او عصري بڼه جوړ شوی او په يو وخت کې د ۳۰۰ لمونځکوونکو د ځایولو ظرفیت لري.
د هغه په خبره، یاد جومات د هغې پروژې يوه برخه ده چې له مخې به يې په دغه تېرې کنډو کې تفريحي پارک، هوټل، روغتيايي مرکز او څو نورې ودانۍ جوړې شي.
کټوازی وايي، دا پنځه کلنه پروژه ده چې کابو د دوه ميليونه امريکايي ډالرو په ارزښت به پکې پانګونه وشي.
د ګردېز ښاروال سيدنظيم مزمل د ياد جومات په جوړېدو خوښي څرګنده کړه او له اړوندو پانګوالو يې وغوښتل چې په دې سيمه کې راتلونکې چارې هم په وخت ترسره او بشپړې کړي.
نوموړي د پکتيا له نورو سوداګرو هم غوښتنه وکړه چې په خپل هېواد کې پانګونه وکړي څو له يوې خوا يې سوداکري پرمخ لاړه شي او له بلې خوا يې خلکو ته ګټه ورسيږي.
د هغه په وینا، کوم سوداګر او پانګوال چې غواړي پانګونه وکړي، دوی ورسره همکاري کوي.
په دې وروستيو کې د امنيت په ښه کېدو سره له ګڼ شمېر ولايتونو څخه سيلانيان د پکتيا بېلابېلو سيمو ته د چکر او تفريح لپاره راځي، ځينې پانګوالو زړه ښه کړی چې په تفريحي سيمو کې يې پانګونه وکړي.
د تېرې کنډو تفريحي پارک هم یو له تفريحي ځایونو څخه دی چې ملي سوداګر حاجي ميرزا کټوازی په شخصي لګښت پکې پانګونه کوي او د خلکو لپاره اسانتیاوې برابروي.
Views: 1620
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن