اټلانټا (پژواک، ۵ زمری ۱۴۰۲):د مالیزیا د کرکټ ملي لوبډلې لوبغاړي په شل اووریزو نړۍوالو لوبو کې نوی نړۍوال ریکارډ جوړ کړی دی.
د مالیزیا کرکټ ادارې پرون په یوه ټویټ کې لیکلي چې د سیزرول عزت په نوم تیز توپاچوونکی لوبغاړی یې د چین خلاف په یوه لوبه کې اووه لوبغاړي سوځولي دي.
سرچینې زیاته کړې چې هغه په څلورو اورونو کې د نهو منډو په ورکولو کې د چین اووه لوبغاړي وسوځول.
د مالیزیا کرکټ ادارې ویلي چې دا لوبه د ۲۰۲۴ زېږدیز کال د نړۍوال جام لپاره د اسیا د غوراوي (ب) سیالیو برخه وه.
په دې لوبه کې د چین لوبډله په ۲۵ منډو وسوځېده چې عزت پکې اووه لوبغاړي وسوځول؛ د مالیزیا لوبډلې یاد هدف په پنځم اوور کې د دوو لوبغاړو په سوځېدو ترلاسه او لوبه یې وګټله.
سیزرول عزت د دې لوبې غوره لوبغاړی اعلان شو.
په دې سیالیو کې د مالیزیا ترڅنګ د چین، میانمار او بوتان لوبډلو هم برخه اخیستې ده.
د یادونې ده، تر اوسه په یوه شل اووریزه لوبه کې د یوه لوبغاړي له خوا شپږ لوبغاړي نه وو سوځول شوي.
Views: 74
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن