اټلانټا (پژواک، ۵ زمری ۱۴۰۲): افغانستان لپاره د امریکا ځانګړي استازي ټام ویسټ ویلي، چې د مرکزي اسیا پنځو هېوادونو استازو سره یې د افغانستان په اړه ناسته کړې ده.
ویسټ د زمري په ۵مه، ناوخته په یو لړ ټویټونو کې لیکلي، چې دا ناسته نن د قزاقستان پلازمینه استانه کې جوړه شوې وه.
هغه زیاته کړې چې، په دې ناسته کې د کوربه قزاقستان، قرغزستان، تاجکستان، ترکمنستان او ازبکستان استازو برخه اخیستې وه.
ټام ویسټ ویلي : “ ددغو هېوادونو له همکارانو سره مې له افغانانو سره د ګډو ملاتړ په تړاو خبرې وکړې. زه له دوی هر یو څخه د امنیت، بشري حقونو، اقتصاد، او بشري اړتیاوو په ګډون د مهمو مسایلو په اړه د بامحتوا خبرو له امله امننه کوم. “
د یادونې وړ ده چې په دې ناسته کې د افغان ښځو او نجونو د حقونو لپاره د امریکا ځانګړې استازې مېرمن رینا امیري هم ګډون کړې وه.
تر دې مخکې د امریکا د بهرنیو چارو وزارت په یوه خبرپاڼه کې ویلي وو، چې امریکایي پلاوی به د جولای له ۲۶مې تر ۳۱مې پورې قطر او قزاقستان ته سفر وکړي او هلته به په افغانستان کې د امنیت، له نشهيي موادو سره د مبارزې او د ښځو پر حقونو خبرې وکړي.
په خبرپاڼه کې راغلي وو، امریکایي پلاوی به په قزاقستان له قرغزستان، تاجیکستان، ترکمنستان او اوزبیکستان له همکارانو سره د سي+۱ ډلې په ځانګړې غونډه کې لیدنه کتنه وکړي.
سرچینې زیاته کړې، هغوی به همدارنګه د مدني ټولنې د غړو سره وګوري او په افغانستان او قزاقستان کې د ښځو ځواکمنتیا به د هغوی د بحث په سر کې ځای ولري.
Views: 164
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن