کندوز (پژواک، ۲۱ زمری ۱۴۰۲): د کندوز سیمهییز مسوولین وایي، تېر یو کال کې څه باندې ۹۰۰ بهرني سیلانیان د دغه ولایت د شېرخان بندر له لارې افغانستان ته راغلي دي.
د کندوز د بهرني ریاست د قونسلګرۍ چارو مسوول عبیدالله عابدي وایي، په تېر یو کال کې له بېلابېلو اروپایي، اسیایي او امریکایي هېوادونو ۹۰۰ بهرني سیلانیان د کندوز د شېرخان بندر له لارې افغانستان ته راغلي او د هېواد له بېلابېلو تاریخي او سیاحتي ځایونو یې لیدنه کړې ده.
هغه زیاتوي، د تېر یو کال په اوږدو کې افغانستان ته د بهرنیو سیلانیانو راتګ په بېساري ډول زیات شوی دی.
نوموړي زیاته کړه: «په تېر یو کال کې الحمدالله د بهرنیو سیلانیانو راتګ ډېر شوی او موږ سیلانیانو لپاره بشپړ امنیت نیولی دی.»
ورته مهال یو شمېر هغه سیلانیان چې هېواد ته راغلي، د امنیت له ټینګښت خوشحاله دي.
د چک جمهوريت یو اوسېدونکی کشکه چې د شېرخان بندر له لارې د سیاحت او تفریح په موخه افغانستان ته راغلی وایي: «موږ پرون د شېرخان له لارې کندوز ته راغلو، مسوولینو موږ سره ډېر ښه چلند وکړ، موږ له کندوز ښاره لیدنه وکړه، په ښار کې وګرځېدو؛ خلکو موږ سره ډېره ښه چلند وکړ، موږ اوس پرېکړه کړې چې بدخشان ولایت ته ولاړ شوو او د واخان د ښکلي ځایونه وګورو.»
یو بل امریکايي ګرځندوی نیکو چې لومړی ځل د سیاحت او تفریح په موخه افغانستان ته راغلی، د خپل سفر موخه د خلکو کلتور سره پېژندګلوی او د هېواد د تارخي سیمو لیدنه بیانوي.
هغه زیاته کړه: «زما نوم نیکو دی، زه د قزاقستان او تاجکستان له لارې افغانستان ته راغلې یم، زه غواړم چې د بدخشان له واخانه لیدنه وکړم، د واخان په اړه مې ډېر اورېدلي، موږ هیڅ ستونزه نه لرو، مسوولینو موږ سره ډېر ښه چلند وکړ.»
دا په داسې حال کې ده چې مخکې له دې بهرنیو سیلانیانو د افغانستان نورو ولایتونو ته هم سفرونه کړي دي.
Views: 107
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن