میدان‌وردګو کې د ترافیکي پېښې له امله اوو کسانو ته مرګ‌ژوبله اوښتې

میدان‌ښار (پژواک، ۲۱ زمری ۱۴۰۲): میدان‌وردګو کې مسوولین وایي، نن سهار د دغه ولایت په دایمیرداد ولسوالۍ کې د کوچیانو د یوه ټراکتور چپه کېدو پېښې له امله څلور کسان مړه او درې نور ټپيان شوي دي.

د دغه ولایت پېښو ته د رسېدنې ریاست پژواک خبري اژانس ته په رالېږلې خبرپاڼه کې ویلي، په وژل شوو کسانو کې یوه ښځه او درې ماشومان شامل دي.

سرچینې زیاته کړې چې په دې پېښه کې یوه ښځه او دوه ماشومان ټپيان دي.

په خبرپاڼه کې راغلي، ټپيان د ولسوالۍ روغتون ته انتقال شوي او روغتيايي حالت يې د ډاډ وړ دی.