د بشري حقونو د څار سازمان له اسټرالیا غوښتي چې د افغان پناه‌غوښتونکو د منلو لپاره اداري تشریفات کم کړي

کابل (پژواک، ۲۷ زمری ۱۴۰۲): د بشري حقونو د څار سازمان افغان پناه‌غوښتونکو د منلو په برخه کې د اداري تشریفاتو پر کمولو ټينګار کړی او د اسټرالیا له دولته یې غوښتي چې دغو پناه غوښتونکو ته دې «بشري ویزې» ډېرې کړي.

په استرالیا کې د بشري حقونو د څار سازمان مدیر دانیلا ګاوشون پرون (پنجشنبه) یوه بیانه کې د دغه هېواد له دولته غوښتي څو د زیانمنونکو کسانو بشري ویزو ته رسېدنه په لومړیتوب کې ونیسي؛ ځکه چې د هغه په خبره، یوازې په دغه صورت کې له هغوی سره مرسته شونې ده.

هغه زیاته کړې: «د کډوالو منلو په برخه کې د امنیت ټینګښت یوه اړینه مسله ده، خو غیرعادي شرایط باید د اداري خنډونو د کمولو په معنا وي.»

د بشري حقونو د څار سازمان دغه مدیر په داسې حال کې دا څرګندونې کړي چې په ۲۰۲۱ کال کې، د استرالیا دولت ۲۴ زره او ۵۰۰ افغان پناه‌غوښتونکو ته د پنځو راتلوونکو کلونو لپاره بشردوستانه ویزې ځانګړې کړې دي.

د دانیلا ګاوشون په خبره، د سږکال د مۍ تر میاشتې نیمایي دغه موارد ورکړل شوي، په داسې حال کې چې غوښتنلیکونه له ۴۰ زرو ډېر دي.

د یادونې ده، اوسمهال زرګونه افغانان د دغه هېواد په ګاونډيو هېوادونو او دغه راز په اندونیزیا کې د بشري ویزو تر لاسه کولو او اسټرالیا ته د کډوالۍ لپاره په تمه دي.