کابل (پژواک، ۱۲ وږي ۱۴۰۲): د کابل ښاروالي وایي، د ښار د معیاري ودې او له ناروغیو څخه د ښاریانو د خوندیتوب په موخه، د ښار په بېلابېلو زونونو کې د څارویو حلالولو لپاره ځانګړي ځایونه ټاکي.
د کابل ښاروالۍ په خبرپاڼه کې راغلي چې په کاریزمیر او ریشخورو سېمو کې د څارویو حلالولو له ځایونو څخه د ګټې اخیستې او د کابل ښار په بېلابېلو زونونو کې د نویو ځایونو ټاکلو په موخه د کابل ښاروالۍ او د کرنې، مالدارۍ او اوبو لګولو وزارت ترمنځ د همکارۍ هوکړه لیک لاسلیک شو.
سرچېنې لیکلي، د یاد هوکړهلیک پر بنسټ به په کاریزمیر او رېشخورو سېمو کې د کرنې،مالدارۍ او اوبو لګولو وزارت اړوند د څارویو حلالولو له ځایونو ګټه واخېستل شي.
خبرپاڼه کې د کابل ښاروالۍ د ښاري خدمتونو او چاپیریال ساتنې ادارې مرستیال مولوي محمدخالد له قوله راغلي، د هټیو مخې ته، عمومي ځایونو او د هوټلونو په انګړ کې د څارویو حلالول ښاري تخلف ګڼل کيږي.
خبرپاڼه کې راغلي: «کابل ښاروالۍ پلان لري، څو د ښار د معیاري ودې او له ناروغیو څخه د ښاریانو د خوندیتوب په موخه، د ښار په بېلابېلو زونونو کې د څارویو حلالولو لپاره ځانګړي ځایونه وټاکي چې دا کار به تر تخنیکي او فني سندونو له بشپړيدو او له سروې وروسته ډېر ژر د کابل ښاروالۍ له لوري له کرنې، مالدارۍ او اوبو لګولو وزارت سره په همغږۍ بشپړ شي.»
د کرنې او مالدارۍ وزارت د مرستیال مولوي صدراعظم عثماني هم ویلي چې د همغږۍ اصل ته په کتو به ډېر ژر ټاکل شویو موخو ته ورسیږي.
Views: 240
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن