امیرخان متقي د مسکو فارمټ ناسته کې ګډون کوي

کابل (پژواک، ۲۳ وږی ۱۴۰۲): د افغانستان د بهرنیو چارو وزارت وایي، د دغه وزارت سرپرست مولوي امیرخان متقي د مسکو فارمټ په پنځمه ناسته کې ګډون کوي.

ټاکل شوې ده، چې دا ناسته د روان زیږدیز کال د سپټمبر میاشتې په ۲۹مه د روسیې په کازان ښار کې ترسره شي.

د بهرنیو چارو وزارت مرستیال ویاند حافظ ضیاءاحمد تکل د وږي په ۲۳مه، پژواک اژانس ته وویل چې امیرخان متقي ته په یاده ناسته کې د ګډون بلنه ورکړل شوې وه چې د افغانستان لخوا ومنل شوه.

هغه زیاته کړه چې په دې ناسته کې د افغانستان او سیمې د حالاتو په اړه خبرې کېږي.

تکل وایي، په دې ناسته کې د بیارغونې د پروژو پر جلب او تطبیق هم خبرې کېږي.

Views: 136