سرچینې: هند افغانانو ته زر تحصیلي بورسونه ځانګړي کړي

کابل (پژواک، ۲۶ وږی ۱۴۰۲): سرچینې وايي چې هند د افغانانو  لپاره د لیسانس او ​​ماسټرۍ برخو کې ۱۰۰۰ تحصیلي بورسونه ځانګړي کړي دي.

په افغانستان کې د هند سفارت یوې باوري سرچینې نن (یکشنبه) پژواک خبري اژانس ته وویل چې د هند د فرهنګي اړیکو شورا (ICCR) د ۲۰۲۳-۲۰۲۴ تحصیلي کلونو لپاره د دغه هېواد په پوهنتونونو او انسټیټیوټونو کې د لیسانس او ​​ماسټرۍ ۱۰۰۰ انلاین تحصیلي بورسونه اعلان کړي دي.

د سرچینې په خبره، دغه بورسونه د سوداګرۍ مدیریت، کمپیوټرساینس، هنرونو او نورو برخو کې دي.

په همدې حال کې يوې بلې سرچينې هم پژواک ته دغه خبر تاييد کړ او ويې ويل، ټول هغه کسان چې عمرونه یې ١٨-٣٥ کلونو پورې وي، کولاى شي دغو بورسونو ته نوم ليکنه وکړي.