په لوګر او میدان‌وردګو کې له ۲۵۰ کورنیو او سلو معلولینو سره مرستې وشوې

کابل (پژواک، د تلې لومړۍ نېټه ۱۴۰۲): سيمه‎‌ییز مسوولین وایي، په لوګر کې ۲۵۰ بې‌ځایه شوو کورنیو ته د لمریزې برېښنا وسایل او په میدان‌وردګو کې سلو معلولینو ته ویلچر بایسکیلونه ورکړل شول.

د لوګر د کډوالو او بېرته راستنېدونکو چارو ریاست امر مسعود اخندزاده پژواک خبري اژانس ته وویل چې نن یې د دغه ولایت په بره‌کي‌برک ولسوالۍ کې شاوخوا ۲۵۰ بې‌ځایه شوو کورنیو ته د لمریزې برېښنا وسایل ورکړل شول.

هغه وویل چې دغه مرسته یې د ملګرو ملتونو د کډوالو چارو عالي کمېشنرۍ په مالي ملاتړ وېشلې ده.

د هغه د معلوماتو له مخې، د لمریزې برېښنا برابرولو لپاره یې هرې کورنۍ ته ۱۵ قلمه توکي ورکړي چې دوه سولرونه، دوه بېټرۍ، یو چوکاټ، یو کنټرولر، یو صندوق، ۱۵ متره لین او نور اړین وسایل په کې شامل دي.

هغه دغه راز وویل، هڅه روانه ده چې په راتلونکي کې د لوګر پاتې ولسوالیو کې هم بېځایه شوو کورنیو ته د یو شمېر نړۍوالو بنسټونو په مرسته ورته لمریزه برېښنا برابره کړي.

بلخوا، نن په میدان‌وردګو ولایت کې د ترکیې یوه خیریه بنسټ له سلو معلولینو سره د ویلچر بایسکیلونو مرسته وکړه.

په میدان‌وردګو کې د دغه بنسټ استازی جمشید ایوبي وایي چې د نورو بشري مرستو ترڅنګ دغه بنسټ په هېواد کې له ۶۰۰ معلولینو سره د ویلچر بایسکیلونو مرسته کوي.

هغه وایي، له یادو مرستو یې نن په میدان‌وردګو ولایت کې سل معلولینو ته ویلچرونه ورکړي دي.