تورخم کې یو کس د شل زره ډالرو د قاچاق په تور نیول شوی

کابل (پژواک، ۷ تلې ۱۴۰۲): د کورنیو چارو وزارت وایي، د تورخم سرحدي پولیسو یو کس د ۲۰ زره امریکایي ډالرو د قاچاق په تور نیولی چې غوښتل یې دغه پیسې په ناقانونه توګه ګاونډي هېواد ته انتقال کړي.

د کورنیو چارو وزارت پر خپله اېکس‌پاڼه لیکلي، د سرحدي پولیسو لوی ریاست منسوبینو په تورخم کې یو کس د پلټنې او تلاشۍ پر مهال په داسې حال کې نیولی چې ۲۰ زره امریکایي ډالر یې په خپلو څپلیو کې په ډېر مهارت ځای پرځای کړي وو.

سرچینې لیکلي چې دغه کس غوښتل یادې پیسې په ناقانونه ډول ګاونډي هېواد ته انتقال کړي.

د یادونې ده، له دې مخکې هم د هېواد په سرحدي پولو کې په غیرقانوني توګه د پیسو انتقالوونکي نیول شوي.