کابل (پژواک، ۸ تله ۱۴۰۲): نن کابل ښار کې د ۷ ورځو په نسبت د هندې بورې، قزاقي اوړو، پاکستانۍ وریجو او سروزرو بیې ټیټې خو د نفتې توکو بیې لوړې شوې دي.
د «احمدیار ګروپ» تېلو ټانک یوه کارکوونکي پژواک خبري اژاس ته وویل چې نن د تېرې شنبې په نسبت د یوه لېتر پټرولو بیه له ۷۷ څخه ۸۲ او د یوه لېتر ډیزلو بیه له ۶۸ څخه ۷۶ افغانیو ته لوړه شوې ده.
دغه راز د کابل ښار د کلوله پشته سیمې یو ګاز پلورونکی محمدشریف وایي چې نن یو کیلوګرام ګاز په ۶۱ افغاني پلوري.
هغه زیاته کړه چې ۷ ورځې مخکې د یوه کیلو ګاز بیه ۵۷ افغانۍ وه.
دغه پلورونکي د نړۍ په کچه د نفتي توکو د بیو لوړېدل، د سالنګ لارې تړل کېدو له امله په بازارونو کې د نفتي توکو کمښت، په کابل کې د نفتي توکو د بیو لوړېدو لامل بولي.
د وریجو، اوړو او بورې بیې ټیټې شوې دي.
کابل کې د خوراکي توکو اتحادیې رییس زمري صافي پژواک خبري اژانس ته وویل چې د تېرې شنبې په پرتله نن د ۴۹ کیلوګرامه اوړو بیه له ۱۷۷۰ څخه ۱۷۵۰ افغانیو، ۲۴ کیلوګرامه پاکستانۍ لومړۍ سیله وریجو بیه له ۲۸۰۰ څخه ۲۷۰۰ افغانیو د ۴۹ کیلوګرامه هندي بورې بیه له۳۵۰۰ څخه ۳۴۵۰ افغانیو ته راټیټې شوې دي.
هغه وایي چې د تورخم دروازې له پرانیستلو او د وارداتو ډېرېدو له امله د ځینو خوراکي توکو بیې ټیټې شوې دي.
د هغه په خبره، نن د تېرې اونۍ په څېر، ۱۶ لېتره مالیزیایي غوړي په ۱۴۵۰ افغانۍ، یوه کیلوګرام تور افریقایي چای ۴۰۰ افغانۍ او یوه کیلوګرام شین اندونیزیایي چای په ۳۵۰ افغانۍ دي.
د ځينو توکو پرچون او عمده بیې په یو شمېر مواردو کې لږ خو په ځینو کې بیا ډېر توپیر لري.
د کابل ښار په دهن باغ سیمه کې د خوراکي توکو یوه پرچون پلورونکي حامد صوفيزاده وویل، نن په پرچون ډول ۴۹ کیلوګرامه قزاقي اوړه په ۱۸۰۰ افغانۍ، ۲۴ کیلوګرامه لومړۍ سېله پاکستانۍ وریجې په ۲۷۵۰ افغانۍ، ۴۹ کیلوګرامه هندي بوره په ۳۵۵۰ افغانۍ، ۱۶ لېتره مالیزیايي غوړي په ۱۵۰۰ افغانۍ، یو کیلوګرام اندونیزیایي شین چای په ۴۰۰ افغانۍ او یو کیلوګرام افریقایي تور چای په ۴۵۰ افغانۍ پلورل کېږي.
د سروزرو بیه ټیټه شوې ده.
د کابل ښار په تیمور شاهي کې د سروزرو یوه پلورونکي محمدفواد وویل چې نن د ۷ ورځو په پرتله یو ګرام ٧٥٠عیار عربي سروزرو بیه له ۴۱۰۰ نه ۴۰۰۰ افغانیو او د یو ګرام ۵۸۵ عیار روسي سروزرو بیې له ۳۲۰۰ نه ۳۱۰۰ افغانیو ته ټیټه شوې ده.
د سروزرو د پلورونکو په خبره د کابل په بازارونو کې د سروزرو بیې په نړۍوالو بازارونو د هغو د بیو له تغییر سره اړیکه لري.
د اسعارو بیې
د کابل ښار په شهزاده سرای کې د صداقت صرافۍ مالک حاجي حسین وویل چې نن د یوه امریکایي ډالر د پېر بیه ۷۷.۱۰ افغانۍ او زر پاکستانۍ کلدارې ۲۶۰ افغانۍ تبادله کېږي.
دا په داسې حال ده چې د تلې په لومړۍ یو امریکایي ډالر په ۷۸ افغانۍ او زر پاکستانۍ کلدارې په ۲۵۰ افغانۍ تبادله کېدلې.
هغه د افغانیو پر وړاندې د ډالرو بیې د ټيټېدو لامل د مرکزي بانک له لوري د ډالرو د پلور زیاتېدل بولي.
Views: 19
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن