کندهار کې د څلورو تاریخي آبدو د ترمیم چارې پيل شوې

کندهار (پژواک، ۱۳ تله ۱۴۰۲) په کندهار کې ميرويس خان نيکه او احمدشاه بابا د زيارتونو د ګٌنبتو  ترڅنګ د احمد شاه بابا د کور او په سپين بولدک ولسوالۍ کې د احمدشاهي حوض د رغونې چارې راپيل شوې.

په همدې موخه د اطلاعات او فرهنګ سرپرست وزیر ملا خیرالله خیرخواه کندهار ته راغلی وو ، دلته یې لومړی د میرویس خانه نیکه له زیارت، احمد شاه بابا له کور او مقبرې څخه لیدنه وکړل.

د اطلاعات او فرهنګ سرپرست وزیر وویل، پر دغه څلورو آبدو شاوخوا ۲۴ میلیونه افغانۍ لګښت راځي چې ۲۲ میلیونه د همدغه وزارت او ۲ میلیونه افغانۍ د نورو موسساتو له خوا ورکول کیږي.

ده زیاته کړه: «موږ د تاریخي اثارو ساتنې ته کاملاً ژمن یو، احمدشاه بابا او میرویس خان نیکه زموږ هغه اتلان دي، چې د بهرنيو یرغلګرو په ماتولو افغانانو ته زرین تاریخ پرې ایښی دی او موږ به هم د هغوی پر لاره ځو.»

هغه وویل ، دا مهال د کندهار تر څنګ په غزني، هرات او ځینو نورو ولایتونو کې د تاریخي ابداتو د ترمیم چارې روانې دي او یوازې د روان کال پر پروژو ۲۶۰ میلیونه افغانۍ لګښت راځي چې دا پيسې د وزارت او موسساتو په ګډه ورکول کیږي.

د اطلاعات او فرهنګ سرپرست وزیر خیر خواه وویل، د تاریخي ابداتو له ترمیم سره به لا ډېر بهرني سېلانیان افغانستان ته راشي چې دا کار د افغانستان پر اقتصاد مستقیم اغېز لري.

په دې غونډه کې د کندهار د اطلاعات او فرهنګ رییس مولوي انعام الله سمنګاني هم وویل، د داخلي سېلانیانو ترڅنګ د اسلامي امارت له راتګ سره کندهار ته د بهرنیو سېلانیانو راتګ خورا ډېر شوی، چې د یادو آبدو په رغونې سره به لاهم سیاحت پراختیا وکړي.

ده زیاته کړه: «موږ په دې هیله یو چې د دغه ابدو کارونه په لوړ معیار او ښه کیفیت تر سره شي تر څو د نړېدو له ګواښ سره مخ نه شي، او په راتلونکې کې به هم د دې تاریخي ځایونو ښه ساتنه وشي ځکه چې دا به بهرني سېلانیان دې ته را جلب کړي چې لیدنه ترې وکړي.»

بل خوا د کندهار د سوداګرۍ او پانګونې خونې رییس محمد صدیق مهمند بیا د سوداګرو په استازیتوب د هر ډول همکاریو ډاډ ورکړ او غوښتنه یې وکړل چې د لوی امپراتور عليحضرت احمدشاه بابا د زیات شاوخوا دې پارک جوړ شي ځکه دا مهال دغه ځای کورونو چاپير کړی دی.

که څه هم کندهار کې په تېرو کلونو کې د تاریخي ابداتو د ترمیم چارې څو ځله پيل شوي خو نیمګړي پاتې شوي.

چارواکي دا ځل په ټينګار سره ژمنه کوي چې تاریخي ابداتو او اماکنو ته به پوره پاملرنه کیږي.