کابل (پژواک، ۱۵ تله ۱۴۰۲): د شهیدانو او معلولینو چارو وزارت وايي، په کابل ښار کې یې د یتیمانو او معلولینو لپاره د حرفوي زدهکړو پنځه میاشتنی پروګرام پيل کړی چې په اوو بېلابېلو برخو کې به زدهکړې وویني.
د شهیدانو او معلولینو چارو وزارت مرستیال ملا عبدالرزاق اخند په دې تړاو یوې غونډې ته وویل چې په دغه پروګرام کې به ۱۲۰ یتیمانو او معلولینو ته د خیاطۍ، کمپیوټر، د برېښنایي وسایلو د ترمیم، د مبایلونو، جنراتورونو، یخچالونو او موټرسایکلونو د ترمیم برخو کې حرفوي زدهکړې ورکړل شي.
د یاد وزارت بل مرستیال عبدالحکیم حقاني بیا وویل چې اسلامي امارت هڅه کوي د یتیمانو او معلولینو لپاره د هوساینې او زدهکړو زمینه برابره کړي څو له یوې خوا وکولی شي د خپلو هڅو له لارې حلال رزق ترلاسه کړي او له بلې خوا خپلې کورنۍ او ټولنې ته د خدمت جوګه وګرځي.
هغه وویل: «د شهيدانو وارثينو او معلولينو ته د خدمتونو وړاندې کول زموږ مکلفيت او دنده ده.»
هغه د یاد پروګرام له ګډونوالو وغوښتل چې له دغه فرصته ښه ګټه پورته کړي.
Views: 61
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن