د قوش‌‌تېپې کانال لومړي فاز چارې بشپړې شوې او د دویم یې پیلېږي

کابل (پژواک، ۱۹ تله ۱۴۰۲): د ریاست‌الوزراء اقتصادي مرستیال ملا عبدالغني برادر د یوه پلاوي په مشرۍ د قوش‌تیپي کانال د لومړي فاز ګټې اخیستنې ته د سپارلو او د دویم فار کار پیلېدو مراسمو کې د ګډون په موخه بلخ ته سفر وکړ.

د راپورونو له مخې، د قوش‌تېپې کانال ۲۸۰ کیلومتره اوږدوالی، ۱۰۰ کیلومتره پلنوالی او اته عشاریه پنځه متره ژوروالی لري او په بلخ، جوزجان او فاریاب ولایتونو کې د ۵۰۰ زره هکټاره ځمکې خړوبولو ظرفیت لري.

دغه کانال – چې د راپورونو له مخې د امو سیند د لس میلیارد متر مکعب اوبو تېرولو ظرفیت لري – د بلخ له کلدار ولسوالۍ پیل شوی او له جوزجانه په تېرېدو د فاریاب اندخوی ولسوالۍ ته رسېږي.

د قوش‌تېپې کانال جوړولو کار د تېر کال د وري په لومړیو کې پیل شوی دی.

د ارګ په خبرپاڼه کې راغلي چې د یاد کانال د لومړي فاز کار له ټاکل شوي وخته اته میاشتې مخکې بشپړ شوی دی.

د سرچینې معلوماتو له مخې، د قوش‌تېپې کانال لومړی فاز ۱۰۸ کیلومتره اوږدوالی لري چې د بلخ ولایت په کلدار ولسوالۍ کې د امو له سینده پیلېږي؛ د حیرتان له اوږدو دښتو تېرېږي او تر دولت‌اباد ولسوالۍ پورې رسېږي.

د ریاست‌الوزراء اقتصادي مرستيال ملا عبدالغني برادر اخند په مشرۍ لوړپوړي امارتي پلاوي نن سهار د قوش‌تېپې کانال د لومړي فاز ګټې اخیستنې ته د سپارلو او د دویم فاز چارو د پیل مراسمو کې د ګډون په موخه بلخ ولایت ته سفر وکړ.

مسوولین وايي، د دغه لوی کانال د امکان‌سنجۍ مطالعات په ۱۳۹۷ کال کې پیل شوي وو او کار به یې په درېیو فازونو کې بشپړ شي.

د هغوی په وینا، د دې پروژې ټول کارونه د ۶۰ میلیارد افغانیو په لګښت د هېواد له ملي بودجې او د افغانستان ملي پراختیا شرکت له خوا پلي کېږي.