کابل (پژواک، ۵ لړم ۱۴۰۲): د امریکا د متحده ایالاتو دفاع وزارت اعلان کړی چې په سوریه کې یې د سپاه پاسداران او «د ایران تر ملاتړ لاندې ملېشو» پر دوو تأسیساتو هوايي بریدونه کړي دي.
د امریکا د بهرنیو چارو وزارت یوه چارواکي ویلي، دغه بریدونه نن سهار د امریکا د ولسمشر جو بایډن په امر د دوو (F-16) الوتکو له لوري د عراق سره پر پوله د سوریې یوه ښار ابو کمال ته نږدې ترسره شوي دي.
د امریکا دفاع وزیر لویډ اسټین هم په یوه بیان کې ویلي: «دغه دقیق دفاعي بریدونه په عراق او سوریه کې پر امریکايي پرسونل د ایران تر ملانړ لاندې ډلو له خوا د پرله پسې او ناکامو بریدونو په غبرګون کې چې د اکتوبر له ۱۷ مې پیل شوې، ترسره شوي دي.»
رویټرز راپور ورکړی چې تیره اونۍ په عراق او سوریه کې د ایران تر ملاتړ لاندې ملېشو د متحده ایالاتو او ائتلاف پر ځواکونو لږ تر لږه ۱۹ بریدونه کړي دي.
دا برید په داسې حال کې شوی چې د امریکا دفاع وزیر له دې وړاندې ویلي وو، پر امریکايي ځواکونو د ایران تر ملاتړ لاندې ډلو له لوري بریدونه د منلو وړ نه دي او باید ودرول شي.
تېره ورځ سپینې ماڼۍ هم اعلان کړی و چې بایډن د ایران رهبر عليخامنهيي ته یو پیغام استولی او تهران ته یې په منځني ختیځ کې پر امریکايي پرسونل د برید کولو په اړه خبرداری ورکړی دی.
Views: 104
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن