د کرکټ نړۍوال جام سیالۍ؛ افغانستان نن له سریلانکا سره لوبه کوي

کابل (پژواک، ۸ لړم ۱۴۰۲): د افغانستان کرکټ ملي لوبډله د نړۍوال جام سیالیو په لړ کې نن خپله شپږمه لوبه د سریلانکا پر وړاندې ترسره کوي.

د افغانستان کرکټ بورډ پر خپله فېسبوک‌پاڼه لیکلي، د افغانستان کرکټ ملي لوبډله د نړۍوال جام سیالیو په لړ کې نن د سریلانکا پر وړاندې لوبه ترسره کوي.

کرکټ بورډ ویلي، نننۍ سیالي به د افغانستان پر وخت د ماسپښين یوه بجه پیل شي.

د راپورونو له مخې، افغان لوبډلمشر تېره ورځ په یوه خبرې غونډه کې ویلي چې دا سیالۍ به د دواړو لوبډلو لپاره سخته وي ځکه له تېر یوه کال راهیسې افغانستان او سریلانکا له یو بل سره ډېر کرکټ کړی او ښه یو بل پیژني.

نوموړی ویلي‎، په نړۍوال جام کې تر اوسه افغان لوبډله ښه روانه ده او دا به د کرکټ په تاریخ کې تر دې مهاله تر ټولو ښه ټورنمنټ وي.

په دغه کنفرانس کې افغان لوبډلمشر د یوې پوښتنې په ځواب کې ویلي: «موږ هره لوبه فاینل ګڼو.»

افغانستان تر دې مهاله د نړۍوال جام سیالیو په لړ کې پنځه لوبې ترسره کړې، دوه لوبې یې ګټلې او درې نورې یې بایللې دي.

دغه راز د نړۍوال جام سیالیو د نومرو په جدول کې هند لومړی، سوېلي افریقا دویم، نیوزیلینډ درېیم، اسټرالیا څلورم، سریلانکا پنځم، پاکستان شپږم، افغانستان اووم، نیدرلینډ اتم، بنګله‌دېش نهم او انګلیستان لسم ځای لري.