کابل (پژواک، ۱۴ لړم ۱۴۰۲): د راپورونو له مخې، د هسپانیا ساحلي ګارډ د اتلانتیک سمندر د کانري ټاپوګانو کې د ښځو او ماشومانو په ګډون له ۵۰۰ ډېر کډوال له ډوبېدو ژغورلي دي.
امریکا غږ نن په یو راپور کې ویلي، د هسپانیا ساحلي ګارډ تېره ورځ (د لړم ۱۳مه) ویلي چې د اتلانتیک سمندر د کانري ټاپوګانو کې یې له ۵۰۰ زیات پناغوښتونکي له ډوبېدو ژغورلي دي.
په راپور کې د ساحلي ګارډ له قوله لیکل شوي چې دغه شمېر کسان یې چې په څلورو کښتیو کې سپاره وو، ژغورلي او د دوو کسانو مړي یې هم په کښتیو کې موندلي، خو دا یې نه دي ویلي چې مړه شوي کسان د کوم هېواد اوسېدونکي دي.
سرچینې زیاته کړې، د هسپانیا ملکي ګارډ چې د ژغورنې په دغو عملیاتو کې یې برخه اخیستې وه، مطبوعاتو ته ویلي: «دوو پناغوښتونکو وروسته په روغتون کې ساه ورکړه او په ژغورل شوو کې مېرمنې او ماشومان هم شامل دي.»
د سرچینې معلوماتو له مخې، د هسپانیا کورنیو چارو وزارت تېره پنجشنبې ویلي وو چې یوازې د روان میلادي کال په لومړیو لسو میاشتو کې کانري ټاپوګانو ته شاوخوا ۳۰۷۰۰ غیرقانوني کډوالو ځانونه رسولي دي.
Views: 16
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن