کابل (پژواک، ۲۱ لړم ۱۴۰۲): ګلوبل ویټنس موسسې په یوه راپور کې لیکلي چې ټوله نړۍ کې له ۲۰۱۲ تر ۲۰۲۲ پورې لږ تر لږه ۱۹۱۰ د چاپېریالساتنې فعالان وژل شوي، دې موسسې له دولتونو غوښتي څو داسې قانونونه پلي کړي چې د چاپېریالساتنې فعالان خوندي وي.
رویټرز د بریتانیایي موسسې له قوله راپور ورکړی چې یاد د چاپېریالساتنې فعالانو د غیرقانوني او سوداګریزو ګټو پر وړاندې د طبیعت د ساتنې په برخه د هڅو له امله خپل ژوندونه له لاسه ورکړي دي.
د ګلوبل ویټنس موسسې د راپور پر بنسټ، کلمبیا تېر کال د ۶۰ وژنو په درلودو د مړینې تر ټولو لوړه شمېره درلوده.
له دې مخکې یادې موسسې ویلي وو چې یوازې په ۲۰۲۱ میلادي کال کې ټوله نړۍ کې نږدې ۲۰۰ د چاپېریالساتنې فعالان وژل شوي دي.
«ګلوبل ویټنس» موسسې له دولتونو غوښتي څو داسې قانونونه پلي کړي چې د چاپېریالساتنې فعالان خوندي شي، ځکه د دې موسسې د مسوولینو په وینا د چاپېریالساتنې د فعالانو شتون د ځمکې له تودوخې او اقلیمي بدلونونو څخه د نړۍ ژغورلو اړینه سرمایه ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن