اوچا: افغانستان یو له هغو پنځو هېوادونو دی چې ډېرو بشري مرستو ته اړتیا لري

کابل (پژواک، ۲۰ لېندۍ ۱۴۰۲): د ملګرو ملتونو د بشري مرستو همغږي‌کوونکي دفتر (اوچا) دې ته په اشاره چې افغانستان یو له هغو ‎پنځو هېوادونو دی چې ‎ډېرو بشري مرستو ته اړتیا لري، وايي چې په ۲۰۲۴ کال کې په ‎دغه هېواد کې د بشري مرستو لپاره درې میلیاردو ډالرو ته اړتیا ده.

دغه دفتر نن په یوه اعلامیه کې ویلي چې دوی د افغانستان په ګډون په نړۍ کې بشري ناورین ته د رسېدو لپاره راتلونکی کال ۴۶ میلیارد ډالرو ته اړتیا لري.

 اوچا ویلي چې ۲۰۲۴ کال کې د ۷۲ هېوادونو ۱۸۱ میلیون کسان بشري مرستو ته اړتیا لري.

د ملګرو ملتونو د بشري مرستو همغږي‌کوونکي دفتر زیاته کړې چې په ۲۰۲۴ کال کې یوازې د افغانستان د خلکو لپاره د مرستې رسولو په موخه درې میلیاردو ډالرو ته اړتیا ده.

د یاد دفتر په خبره، وسله‌والې نښتې، د چاپېریال بېړنۍ وضعیت او کمزوری اقتصادي حالت په ټوله نړۍ کې زیانمنونکو ټولنو ته زیانونه اړوي چې د لوږې، بې‌ځایه کېدو او د ناروغیو خپرېدو لامل کېږي.

دا په داسې حال کې ده چې اوچا په ۲۰۲۳ کال کې د افغانستان لپاره څلور میلیارده او شپږ میلیونه ډالر غوښتي وو، خو دا غوښتل شوې پیسې تامین نه شوې او د دغه دفتر په خبره، د بودجې کمښت له امله افغانستان کې ۱۰ میلیونو کسانو ته له مۍ تر نومبر میاشتې پورې مرسته ونه شوې.