مهترلام (پژواک، ۲۳ لېندۍ ۱۴۰۲): د لغمان د پېښو پر وړاندې د چمتووالي ریاست مسوولین وایي چې د دغه ولایت د الیشنګ ولسوالۍ اړوند د میل دره رنجون غره په څنګله کې لګېدلی اور مهار شوی دی.
د لغمان طبیعي پېښو پر وړاندې د چمتووالي رییس قاري خیرمحمد غازي د لېندۍ په ۲۳مه پژواک خبري اژانس ته وویل چې د الیشنګ ولسوالۍ د میل درې اړوند په رنجون غره کې لګېدلی اور یې د خلکو په همکارۍ مړ کړی دی.
هغه زیاته کړه: «د ولایتي ادارې په لارښوونه یادې سیمې ته موږ د کرنې، حوادثو او سیندیزې حوزې استازي ورغلي وو چې د مسلکي کارمندانو او د کلیوالو په مرسته مو لګېدلی اور په بشپړ ډول مهار کړ.»
نوموړي وویل چې په دې اورلګېدنه کې د رنجون غره شاوخوا ۱۲۰ جریبه ځنګل له منځه تللی دی.
د یادونې ده، دغه اور پرون لګېدلی و او نن شاوخوا مازیګر مهال په بشپړ ډول مهار شو.
Views: 43
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن