پنجشېر کې د څلوېښتو ښوونځیو او مدرسو د ودانیو بیارغونې چارې بشپړې شوې

پاراخ (پژواک ۲ مرغومی ۱۴۰۲): د پنجشېر ولایت د پوهنې ریاست د پنځه میلیون او اته سوه زره افغانیو په لګښت د ۳۷ ښوونځیو او درېیو مدرسو له بیارغولو خبر ورکوي.

د پنجشېر د پوهنې رییس حبیب‌الله نوري پژواک خبري اژانس ته وویل چې له یادو پیسو ۴،۲ میلیون افغانۍ د پوهنې وزارت او پاتې نورې یې «د افغان ځوانانو لپاره ښوونیزې او روغتیایي موسسې» له لورې ورکړل شوې دي.

هغه څرګنده کړه چې په یادو مدرسو او ښوونځیو کې د نجونو مدرسې او ښوونځي هم شامل دي چې په وروستیو درېیو میاشتو کې د پنجشېر په مرکز او اوو ولسوالیو کې بیارغول شوي دي.