کابل (پژواک، ۱۷ مرغومی ۱۴۰۲): د افغانستان د کار او ټولنیزو چارو وزارت له نهو موسسو سره د یو عشاریه دوه میلیارد افغانیو په ارزښت هوکړهلیکونه لاسلیک کړل.
د یادو هوکړهلیکونو د لاسلیک مراسمو کې د کار او ټولنیزو چارو وزارت د بهرنیو اړیکو ریاست سرپرست حافظ عزیزالرحمن وویل چې د یادو هوکړهلیکونو په اساس به د هېواد په ۸ ولایتونو کې له ۶۰۰۰ یتیمو ماشومانو سره مرستې او د هغوی کفالت او ۱۷۰۰ کسانو ته د حرفوي زدهکړو زمینه برابره شي.
نوموړي زیاته کړه، په دغو ولایتونو کې کندهار، پنجشېر، کونړ، خوست، لوګر، پکتیکا، بامیان او کابل شامل دي چې د هوکړهلیکونو ټول ارزښت یې ۱،۲ میلیارد افغانۍ کېږي.
هغه وویل چې دغه هوکړهلیکونه له نهو داخلي موسسو سره لاسلیک شول.
دغه راز په دې غونډه کې د کار او ټولنیزو چارو وزارت مالي او اداري مرستیال مولوي دینمحمد حقبین له یادو موسسو غوښتنه وکړه چې د خپلو کړونو راپور دې وخت پر وخت له دغه وزارت سره شریکوي.
نوموړي ټینګار وکړ چې موسسې باید د افغانستان د اسلامي امارت له اصولو سره سم خپل فعالیتونه ترسره کړي.
هغه د ملګرو ملتونو او نړۍوالو مرستندویه موسسې غوښتنه وکړه چې له افغانانو سره دې بشري او نورې مرستې وکړي.
حقبین موسسو ته ډاډ ورکړ چې اسلامي امارت د هغوی ملاتړ کوي او که د موسسو د کار پر وړاندې کومه ستونزه وي له یاد وزارت سره دې شریکې کړي.
دغه راز په دې غونډه کې د موسسو په استازیتوب بریالي عمرزي وویل، د ټولو هدف خلکو ته د خدماتو وړاندې کول دي او دوی به په دې برخه کې ډېره هڅه وکړي.
هغه زیاته کړه چې د حکومت له همکارۍ پرته دغه موسسې خپل هدف ته نه شي رسېدلې او باید پوره همکاري وکړي.
نوموړي وویل چې دغه موسسې به د خپلو فعالیتونو راپور وخت پر وخت د کار او ټولنیزو چارو له وزارت سره شریکوي.
دا په داسې حال کې ده چې د روانې مرغومي میاشتې په پنځمه هم د کار او ټولنیزو چارو وزارت له ۱۵ ملي او نړۍوالو موسسو سره د یو میلیارد او ۷۹ میلیون افغانیو په ارزښت ۲۲ هوکړهلیکونه لاسلیک کړي وو.
Views: 58
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن