د لوګر په څرخ ولسوالۍ کې یو کس وژل شوی

پل‌علم (پژواک، ۲۱ مرغومی ۱۴۰۲): د لوګر امنیه قومانداني وایي چې د دغه ولایت د څرخ ولسوالۍ په «سلیمان کلا» سیمه کې یو کس په ډزو وژل شوی دی.

د لوګر د امنیې قوماندانۍ ویاند مولوي احمدالله انس پژواک ته وویل، وژل شوی کس حفیظ‌الله نومېږي او د څرخ ولسوالۍ اوسېدونکی دی.

نوموړي زیاته کړه چې د وژل شوي کس د قتل په تور یو کس نیول شوی دی.

د وژل شوي کس خپلوان هم وایي چې حفیظ‌الله له چا سره شخصي دښمنې نه درلوده او معلومه نه ده چې ولې وژل شوی دی.

هغوی له امنیتي ځواکونو غوښتنه وکړه چې په هر اړخیز ډول دغه پېښه وڅېړي.