رینا امیري ادعا کوي چې افغانستان کې ښځې په «سیسټماټیک» ډول له ټولنې لرې کېږي

کابل (پژواک، ۲۲ مرغومی ۱۴۰۲): د افغان ښځو او بشري حقونو لپاره د امریکا ځانګړې استازې ویلي چې له تېرو دوو کلونو راهیسې افغانستان کې د ښځو حقونه تر پښو لاندې کېږي خو ا.ا دا ډول څرګندونې بیا بیا رد کړې دي.

د افغان ښځو او بشري حقونو لپاره د امریکا ځانګړې استازې رینا امیري د امریکا د استازو جرګې په ناسته کې ویلي چې له تېرو دوو کلونو راهیسې په افغانستان کې د ښځو حقونه تر پښو لاندې شوي او ښځې په «سیسټماټیک» ډول له ټولنې لرې کېږي.

هغې زیاته کړې چې افغان مېرمنې د نړۍوالې ټولنې مرستې ته اړتیا لري او په افغانستان کې د ښځو حقونو لپاره یوازې امریکا نه بلکې ټوله نړۍ هڅې کوي.

د راپورونو له مخې، دغه څرګندونې د امریکا د استازو جرګې د بهرنیو اړیکو کمېټې له لوري د افغانستان په اړه د بایډن د حکومت د تګلارې ارزونې په ناسته کې شوې دي.

دا په داسې حال کې ده چې د بښنې نړۍوال سازمان او د ملګرو ملتونو د بشري مرستو د همغږۍ ادارې یا اوچا هم د تېرې لېندۍ میاشتې په لومړیو کې افغانستان کې د ښځو له حقونو د سرغړونې په اړه اندېښنه ښودلې وه.

د افغانستان سرپرست حکومت چارواکو تر دې مهاله د رینا امیري د یادو څرګندونو په اړه څه نه دي ویلي خو د اسلامي امارت ویاند ذبیح‌الله مجاهد د بښنې نړۍوال سازمان او اوچا د څرګندونو په اړه ویلي وو: «افغانستان کې هر چا ته خپل حقونه رسېدلي او موږ اوس هم کوښښ کوو څو د خلکو حقونو ته رسېدنه وشي. دا اسلامي نظام دی د خلکو حقونه پېژني او خلکو ته یې د حقونو د ورکړې ژمنه کړې، هغوی باید په دې اړه تشویش ونه کړي.»