ننګرهار او اروزګان کې له څه باندې ۳۲۰۰ کورنیو سره مرسته وشوه

ترینکوټ، جلال‌اباد (پژواک، ۲۵ مرغومی ۱۴۰۲): سیمه‌ییز مسوولین وایي، د ملګرو ملتونو د خوړو نړۍوال پروګرام له لوري په اروزګان او ننګرهار کې له څه باندې ۳۲۰۰ کورنیو سره مرسته شوه.

د اروزګان د کلیو بیارغونې او پراختیا ریاست اداري مدیر ننګیالي حبیبي پژواک خبري اژانس ته وویل چې په دغه ولایت کې له دوه زره او ۶۲ کورنیو سره د خوراکي توکو مرستې وشوې.

دغه راز، ننګرهار کې د کلیو بیارغونې او پراختیا رییس مولوي قسمت‌الله مبارز هم وایي چې په دغه ولایت کې له ۱۲۰۸ اړمنو کورنیو سره مرستې وشوې.

د سرچینو د معلوماتو له مخې، دغه مرستې د ملګرو ملتونو د خوړلو نړۍوال سازمان له لورې شوې او هرې کورنۍ ته په دغو مرستو کې ۵۰ کیلوګرامه اوړه، څلورنیم لېتره غوړي، شپږ کیلوګرامه دال، مالګه او د ماشومانو تقویتي خواړه ورکړل شوي دي.