کابل (پژواک، ۲۸ مرغومی ۱۴۰۲): د افغانستان کرکټ بورډ وایي چي اسټرالیايي شېن مکډرمټ یې د هېواد د کرکټ ملي لوبډلې د ډګرساتنې برخې روزونکي په توګه ګومارلی دی.
کرکټ بورډ نن په یوه اعلامیه کې ویلي، شېن مکډرمټ د ملي لوبډلې د ډګرساتنې برخې نوي روزونکي په توګه وګومارل شو چې د راتلونکې فبرورۍ په لومړیو کې به د سریلانکا پر وړاندې له لوبلړۍ مخکې له افغان ملي لوبډلې سره یوځای شي.
بورډ زیاته کړې، مکډرمټ د ظرفیت لوړونې برخه کې د درېیمې درجې سند لرونکی روزونکی دی چې له دې مخکې یې د بنګلهدېش، سریلانکا او اسټرالیا کرکټ لوبډلو سره په بېلابېلو روزنیزو برخو کې د کار کافي تجربه لري.
سرچینې ویلي، مکډرمټ په ۲۰۲۲ کال کې د بنګلهدېش ملي لوبډلې د ډګرساتنې برخې د مرستیال روزونکي په توګه دنده هم ترسره کړې ده.
په اعلامیه کې ویل شوي نوموړی همدارنګه تر ۲۰۱۹-۲۰۲۱ کال پورې د سریلانکا له ملي لوبډلې سره د ډګرساتنې برخه کې کار کړی چې ترڅنګ یې په همدې موده کې د سریلانکا د الف لوبډلې د مشر روزونکي دنده هم پر مخ وړې ده.
کرکټ بورډ زیاته کړې، شېن مکډرمټ له ۲۰۱۲ تر ۲۰۱۹ کال پورې د اسټرالیا د ملي لوبډلې د لنډمهاله مرستیال روزونکي او د ډګرساتنې روزونکي په توګه دنده ترسره کړې او دغه راز د لنډ مهال لپاره د اسټرالیا الف لوبډلې د کارکردګۍ څېړونکي او ډګرساتنې روزونکي په حیث هم پاتې شوی دی.
سرچینه وایي، د دې ټولو مسوولیتونو او دندو ترڅنګ شېن مکډرمټ د ۲۰۲۱ او ۲۰۲۲ کال د شلاوریزو سیالیو نړۍوال جام او همدارنګه د ۲۰۲۳ کال د یو ورځنیو سیالیو نړۍوال جام کې له بېلابېلو لوبډلو سره د روزونکي په توګه دندې ترسره کړې دي.
د یادونې ده، د افغانستان کرکټ بورډ د ملي لوبډلې لپاره د کارکردګۍ څېړنې او فزیکي تکړښت برخه کې هم د روزونکو په لټه کې دی او یاد بستونه یې اعلان ته ورکړي دي.
Views: 130
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن