تېره میاشت افغانستان ته د نږدې ۳۰۰۰ بهرنیو وګړو تګ راتګ ثبت شوی

کابل (پژواک، ۲ سلواغه ۱۴۰۲): د افغانستان د احصايې او معلوماتو ملي اداره وایي، د تېرې میاشتې په اوږدو کې یې د هوايي ډګرونو او ځمکنيو بندرونو له لارې هېواد ته د دوه زره او ۹۷۰ بهرنیو وګړو تګ راتګ ثبت کړی دی.

د احصايې او معلوماتو ملي ادارې په خبرپاڼه کې راغلي، ثبت شوي ارقام ښيي چې د روان لمریز کال په مرغومې میاشت کې د ۱۹ ښځینه ‌وو په ګډون، ۱۵۵۱ بهرني وګړي افغانستان ته راغلي او ۱۴۱۹ نور، چې له دې ډلې ۱۹یې ښځې دي، له افغانستانه وتلي دي.

د دې ادارې د ثبت شوو ارقامو پر بنسټ، د بهرنیو وګړو تر ټولو ډېر تګ راتګ د نیمروز ولایت له بندره، د هرات ولایت له هوايي ډګر او بندرونو او د تورخم بندر له لارې ثبت شوی دی.