لغمان او سمنګان کې د ترافیکي پېښو له امله نهه کسان ټپیان شوي

مهترلام، ایبک (پژواک، ۲ سلواغه ۱۴۰۲): په لغمان او سمنګان ولایتونو کې د ترافیکي پېښو له امله ۹ کسان ټپيان شوي دي.

د لغمان امنیې قوماندانۍ ویاند یونس یوسفزی وايي، نن (د سلواغې دویمه) د مهترلام ښار پنځمې حوزې مربوطاتو کې د ترافیکي پېښې له امله ۵ کسان ټپيان شوي دي.

د هغه په خبره، پېښه د دوو کرولا موټرو د ټکر له امله رامنځته شوې او لامل یې د موټرچلوونکو بې احتیاطي یادوي.

نوموړی وايي، د یوې مېرمنې په ګډون د پېښې ټول ټپیان ولایتي روغتون ته لېږدول شوي چې روغتیايي وضیعت یې د ډاډ وړ ښودل شوی.

د یوه بل خبر له مخې، د سمنګان د ترافیکې پېښو مدیر عبدالقهار وايي، د دغه ولایت په حضرت سلطان ولسوالۍ کې د یوې ترافیکي پېښې له امله د دوه مېرمنو په ګډون څلور کسان ټپيان شوي دي.

د هغه په خبره، یاده پېښه د یو سراچه موټر چپه کېدو له امله رامنځته شوې او لامل یې د موټرچلوونکي بې احتیاطي بولي.