غزنيښار (پژواک، ۳ سلواغه ۱۴۰۲ ): په غزني پر نشهیي توکو روږدي ۲۵۰ کسان له درملنې وروسته خپلو کورنیو ته وسپارل شول.
د دغه ولایت امنیه قومانداني وایي، د نشهیي توکو پر وړاندې د مبارزې مدیریت له لوري درې میاشتې وړاندې د یوه کمپاین په ترڅ کې ۸۰۰ روږدي د ښار له بېلابېلو سیمو راټول او د درملنې په موخه یوه روغتیایې مرکز ته لېږدول شوي وو.
له نشهیي توکو سره د مبارزې مدیر مولوي فیضمحمد فیضاني د سلواغې په ۳مه کورنیو ته د دغو کسانو سپارلو مراسمو کې وویل چې روږدي د درملنې ترڅنګ په عقیدوي زدهکړو هم سمبال شوي او د پاتي کسانو درملنې لړۍ به همداسې جریان ولري.
نوموړي وویل، د یادو کسانو درملنې مصارفات او امکانات د دغه ولایت د سیمهییزو ادارو او د کورنیو چارو وزارت له نشهیي توکو پر وړاندې د مبارزې معینیت له لوري ورکول کېږي.
د میدانوردګو ولایت اوسېدونکي احمدخان چې له درې میاشتنۍ درملنې وروسته روغ شوی او کور ته روان و، پژواک ته وویل: «له اسلامي امارته هیله کوو چې موږ ته د کار زمینه برابره کړي، څو موږ ټول یو کسب زده کړو، که چېرې بېکاره و اوسو چې بیا دغه عمل ته مخه نه کړو.»
د دغه ولایت د مسوولینو معلوماتو له مخې، اوس مهال په غزني کې نږدې ۲۰ زره کسان په نشهیې توکو روږدي دي چې ښځې او ماشومان هم په کې شامل دي.
Views: 25
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن